今朝瞓到11點幾就起身，同低能仔 whatsapp咗一陣，就食埋藥再瞓過，4點幾先起身。。。不過依然都好攰，啲藥食咗真係好啲，但都未退到燒，每逢到差唔多夠鐘食藥，就開始燒番，好辛苦！
今日係家姐生日，夜晚同家姐佢哋落香港仔食飯，食泰皇宮！好耐都冇嚟呢到食喇，但我都係冇乜胃口，所以食得好少，不過可以一家人一齊食飯，已經好開心！
原本低能仔今晚要去拍嘢，但最後都去唔到，5點幾佢返咗屋企後，我就叫佢抖吓，我返嚟先買嘢俾佢食！其實我唔係寵佢，只係佢呢排真係好忙，基本上連休息時間都唔夠，難得佢今日可以咁早返，我真係寧願佢響屋企做癱紀休息吓、瞓吓，都唔想佢行嚟行去！
今晚買咗咖喱雞扒飯俾佢食，仲買定嘢飲俾佢，呢種感覺好有小女人嘅幸福感！我真係好鍾意呢種感覺。。。為佢做啲微不足道嘅嘢，都可以好幸福！今晚我哋過咗好悠閒嘅一晚，瞓響到俾佢攬住睇“老表，你好hea！”仲翻睇埋“Sunday扮嘢王”，感覺真係好，加上呢兩套嘢都好好笑，所以令到我好 relax，令到我可以將最近嘅唔開心都暫時放低，低能仔，有你陪我過啲平凡日子，為你做啲簡簡單單嘅嘢，我真係覺得好足夠、好幸福！
分類: 我們的生活點滴 |
