眨吓眼又到假期嘅最後一日，聽日又要返工喇！假期嘅時間好似過得特別快咁。。。
今日十二點幾就起身，飲完茶之後，就去咗買餸，不過可能因為尋晚瞓唔到，成5點幾先瞓得著，其實今日好攰，但好耐都冇煮過飯俾低能仔食，所以好想好想煮俾佢食。。。
今晚佢收工就即刻返咗嚟，有人又買嘢俾我囉！佢之前買俾我嗰部平板電腦，因為睇唔 MYtv & Gotv，所以個傻佬走去買過部新嘅俾我。。。我的確覺得好開心，因為佢重視我，但我唔捨得要佢使咁多錢，其實我有你就足夠架喇！
陪佢食完飯，我哋睇完電視，我就幫佢鍊咗一陣，之後就攬住瞓咗一陣，呢種感覺好舒服，好幸福！或者因為呢種感覺，我願意為佢做更多，依家如果我響佢到，我都會沖埋杯康鈣c同開定爐俾佢沖涼，然後洗埋啲杯同倒埋垃圾先走，我只想你會冇後顧之憂！
曾經聽人講呢啲微不足道嘅嘢，開始時或者令對方會覺得好 sweet，有人幫佢煮飯，服侍得佢周到，但慢慢佢就會覺得係理所當然，唔會再覺得你所做嘅一切係因為愛佢，甚至乎佢已經唔記得當初你第一次為佢學煮嘢時，佢嗰種感動究竟係點樣？！
如果當愛，只剩低理所當然嘅，呢份愛仲會唔會幸福？長久呢？我同低能仔呢年幾裡面，雖然為對方做過唔同大大小小嘅嘢，但幸好我哋都依然覺得對方唔係理所當然為你而做，只係因為我哋愛嘅係對方，重視嘅係對方，所以先希望將最好嘅都留俾對方！到咗今日，我仍然會為佢對我嘅付出而覺得幸福，低能仔，多謝你呀！
分類: 我們的生活點滴 |
