今日係最後一日，最後一日擁有二人世界嘅日子！起身之後，就落香港仔買嘢煮飯，仲有要買拖地嗰個海綿。。。
如果每個女人都有一個夢想，我諗一定係做一個師奶，呢個係每個女人最大嘅成就！每日為自己愛嘅人煮飯、洗衫、執屋同湊 BB。。。今日我一路煮飯，一路諗起低能仔，唔知你又滿唔滿意呢餐飯呢？
今晚我為佢預備咗焗葡國雞、芝麻醬沙律、娃娃菜雲吞粉絲煲仲有辣酒煮花螺，不過我冇留到啲螺俾佢，因為佢唔鍾意食海鮮！其實煮葡國雞係我諗起同佢響澳門嘅時候，第一晚食嗰餐葡國餐，係我食得最冧嘅一餐！
低能仔收工就返咗嚟，見佢食得開心，我就覺得開心！我諗如果唔係因為佢，我根本唔會學識煮飯。。。原來愛一個人真係乜都會為佢學！今晚煮飯整到隻手，個傻佬幫我擦嘢同貼膠布，我未見過一個咁温柔嘅佢。。。我忍唔住望住佢笑咗出嚟，係好 sweet咁笑！
陪咗佢一陣，我就走咗。。。最後一晚，我當然想癡實佢，但如果今晚佢都唔做啲自己想做嘅嘢，佢媽咪返到嚟，就冇得佢咁做。。。所以我只可以俾佢靜靜哋咁做自己嘢！
低能仔，你話假如一世都要食我煮嘅嘢，你都願意。。。我真係好感動！我都希望一世都只為你一個煮飯！
分類: 我們的生活點滴 |
