今日媽咪要返婆婆到，屋企得我一個。。。我決定今日煮飯等低能仔返！今日煮栗子燘雞、菠菜芝士春卷同蒜蓉炒生菜。。。呢餐飯有兩味都係菜，其實係專登架！因為佢平時係多肉少菜，我想佢食多啲菜，等個人健康啲，但如果嗰日買唔啱佢鍾意食嘅菜，佢就食得好勉強，唯有其中一個菜就係整啲特別嘅嘢，等佢可以乖乖哋咁食！今次特別啲嘅就係菠菜芝士春卷，唔用油炸，改用焗爐焗，咁就可以冇油唔怕肥，應該健康啲，希望你乖乖哋食晒去啦！
之前以為栗子燘雞好容易，但原來要用嘅時間都唔少，因為要煲熟咗先整得開啲殼，要一煲好襯熱嘅時候就要整，如果唔係又會癡返實啲栗子肉。。。今日整咗好耐，而且真係好熱，整到手都痛埋，不過只要佢鍾意食，就乜都抵番晒啦！
唔知係咪每次見到佢哋食我煮嘅嘢食得開心呢？我發現我越嚟越鍾意煮嘢食，每次好想煮啲唔同嘅嘢俾佢哋食，但低能仔食嘢種類比較少，有好多嘢都唔整得，每次唔係雞就豬，所以真係諗到頭都爆。。。。其實要諗每餐唔同嘅雞扒點煮，真係一件好難好辛苦嘅事！！下次又應該煮乜呢？
分類: 我們的生活點滴 |
