我們的情人節前夕
今晚好想好想打埋呢篇嘢。。。就算隻手唔方便，都一定要打！因為有啲嘢我一定要記住一生一世！我唔想會遺忘2015年2月13日。
今日都係返寫字樓，朝早低能仔就 whatsapp叫醒我，因為今朝我哋可以一齊食早餐！搞掂啲嘢之後，我就落去買定早餐等佢嚟∼然後就開始做呢個幸福小女人<3
今日返到公司有人就 whatsapp我，對我嘅關心令我今日成日都笑，因為我今日以一個傷殘人士身份返工，低能仔怕我做操重嘢，所以不時提醒我要乖乖哋，唔好再唔小心整親！食飯嘅時候，見到佢 Facebook放咗首熊貓，仲要打咗句“送俾女朋友，希望佢鍾意！”第一次佢會為我咁，嗰一刻我真係好感動，佢終於為我做咗啲嘢，會令我覺得佢唔係想收埋我，呢種感覺真係好實在！低能仔，我好愛你，真係真係好愛你∼
今晚有人嚟觀塘接我收工，我哋食嘢時，我叫咗個“忌廉磨菇意大利飯”，我只係諗住佢鍾意食，點知我哋兩個都叫同一樣嘢，佢知我唔係好食到，就要我以後食嘢都唔可以陣係諗佢要諗吓自己！傻佬，我最大嘅願望就係凡事都以你為先，你開心，你幸福，就係我嘅一切！
食完飯睇埋跌打我哋就返銅鑼灣，因為有人要同我行花市！其實我知佢好攰，不過佢依然為咗我而堅持……而且仲買咗個低能仔氫氣球俾我，仲幫我拎到返屋企，兼且知我鍾意 emoji個公仔，仲突登買咗俾我！其實要一個男人拎住個氫氣球響到行，除咗爸爸會為仔女咁做外，應該好少男朋友會咁做，除非佢真係好愛你，否則……但低能仔冇怨言咁為我而拎，我感覺到佢嘅愛有幾多！今晚我笑得特別多，係因為有你！
聽日就係情人節，雖然我哋夜晚冇得一齊食飯，但你為我預備呢個情人節前夕，我已經覺得好浪漫。。。尤其係我哋今晚臨走前，一齊睇星星嘅時候，我要嘅浪漫就係咁簡單，感謝你為我做嘅一切！親愛的，情人節快樂！
分類: 我們的生活點滴 |
