今日星期四，係我放假嘅日子，呢段日子真係好攰∼今朝瞓到十一點幾就醒咗！
低能仔今日要返學校做功課，佢臨出去之前帶咗我落海怡食晏，然後佢就返學，我就去買餸煮飯今晚等佢返！雖然放假冇佢響身邊好似少緊啲嘢，但佢咁忙我點都要体諒佢，佢最多都係忙多一個月，我相信我哋唔會因為單單一個月見少咗，而令到佢同咗另一個一齊，只要我盡咗女朋友嘅責任，就算變成點樣，我都覺得無悔∼況且等佢忙完之後，我哋就可以開開心心去旅行！
今晚煮咗土匪雞扒、洋葱煙肉焗薯蓉同娃娃菜粉絲雲吞煲！呢排佢成日捱夜，要煮得豐富啲比佢食至得！土匪雞扒係第一次煮嘅餸，唔知啱唔啱佢胃口呢？原本有人話8-9點返，但最後要成十點先響學校走，晚餐最後變宵夜。。。陰公豬，我諗你一定好辛苦同好肚餓∼其實今晚我係咪唔應該煮飯？應該俾佢走咗之後，自己去食完嘢，嗱嗱臨返去抖，而唔係搞住佢呢？
分類: 我們的生活點滴 |
