Day 1 23.06.06

Fri

瞓左四粒鐘。

5.00am起身。

沖涼, 洗頭, 淋花, 洗碗, 收衫, 摺衫, 放好, 舖好床, 整好行李, 收拾乾淨, 倒埋四大袋垃圾。

6.15am 出發!!!!

由屋企直去行10分鐘就去到搭機場巴士, 據說 - 據說每10分鐘一班20分鐘到機場, 搭6.30個班 6.55就應該可以到機場, 跟住Check in入集上機食完早餐瞓2覺食埋lunch3.00pm就到HK。Perfect!!!!!

Perfect!!!!!如果一齊如此的話…..

實情係….

6.15am 出發!!!

因為琴日玩得太盡買得太盡, 得返幾蚊鷄係身, 所以要去ATM攞錢。沿路行, 無時無刻提住叫你攞晒D錢出黎用晒佢既ATM消失得無影無踨, 心諗機場巴士既總站應該有, 話晒都係交通要塞地方, 總有人會無錢搭車既, ATM呢家野又點可以少??? 呵呵~~ 我實在少看佢, 有格, 無就係無比你睇。 一問, 邊到有ATM呀??????

『隔離Train Station ar。』

隔離既意思就真係好隔離, 行3分鐘過返去Spencer Station。不過, 不過, 再不過, 唔好因為Spencer station既超現代外表, 你就以為佢真係好high tech好現代化, 或者又佢真係好high tech, 係ATM太太太low tech, 難怪由街頭行到街尾, 由東邊再行到西邊,  參觀全新既Spencer Station足足5分鐘, 先見到部小小既ATM塞縮係個陰暗角落。

記得麻, 我既perfect行程中係屋企行去車站係10分鐘, 無錯而家我又由車站行返去屋企附近。Shit!
就係咁, 10mins(屋企行去車站) + 10mins(由車站去ATM) + 10 mins(再由ATM行返去車站) = 30mins = 唔再Perfect!!!!!!

6.55am 人仍在巴士上

5分鐘10分鐘????後, 我又係我, 好豬咁落錯車!!!!!

呢個故事敎訓我地執輸行頭真係慘過敗家。

永遠記住1好過2, 快又好過慢, 早又好過遲, 多又好過少, 醒又好過豬, 肥又好過瘦, 大又好過細, 我又好過你, 呀呀呀, 講緊咩呢….係!!!就係架車停係TERMINAL1時唔肯落車, 死要去到TERMINAL2先落, 於時乎迷路了。 用左10分鐘先搵到check in個counter , 唔係, 最多都係7分幾秒 – 我發誓!!!!
好! 又係我最愛既數學題, 問題係:
一個靚女6.15am出門口, 用左10分鐘(屋企行去車站) + 10分鐘(由車站去ATM) + 10 分鐘(再由ATM行返去車站) + 20分鐘(車程) + 7分n秒(迷路) =????????

就係 = 去到check in counter時發現空無一人 = “check in close” = 心肌緊塞 = 由有位座變左無位走 = 唔知上唔上到下班機 = 今日未必走到 = 發呆 = 流口水(等到瞓著) = 行李愈黎愈輕(太悶太餓太無聊唯有食食食) = 去個厠所都操身大細 = 我都發現自己真係死蠢黎!!!!
不過感謝主! 最少而家我有大把時間行熟機場等下次唔會再迷路, 最少唔會再miss左下一班機, 最少去到下班check in時counter唔會再空無一人, 最少下次再miss左飛機時知道可以點做而唔會低能到走去撕機票, 最少下班機係食lunch+dinner咁樣比早機時食breakfast+lunch抵D。

12.30pm 就係咁, 呆坐左3粒幾鐘, 外加睇埋半場意大利對捷克既世盃重溫 (上半場完煬意1:0領先), 終於睇到顯示牌打出

“ CATHAY   CX104       HHONG KONG    14.40       CHECK IN OPEN”

為表承意, 豬咁腳走去排隊。
『我……我…我miss左今朝班機呀, 已經攪左係waitlist, 咁而家有無位呀????唔該。』

「唔…呢班機full晒, 你攞返d行理落黎, 點九再黎過睇下有無位。」

隔離做緊野既肥空姐話原來今朝就係你miss左班機呀???!!!!
咩者, 可以miss左班巴士, miss左班火車, miss左部lift就唔可以miss左班飛機呀?????當然, 心係咁諗, 但我仍然死狗咁樣點晒頭, 唉!
所以我又睇多左2/3場澳洲對克羅地亞 , 澳洲開波唔夠15分鐘就好死蠢咁比人入左一粒, 到我走時佢雖然有多次埋門機會但都時不與我, 希望陣間再check in時無佢咁黑仔。

1.40pm唔夠 我衝住咁去check in counter, 空姐示意我仲未得. 叫我企埋一邊等, 我就好似做錯事既小學生比老師叫左去罰企。一路企一路等, 我就一路咀咒黎check in既人<<<sorry, 亦希望奇積會出現, 出現一個同我一樣丙既丙仔黎唔切上機。
就係最後個1分鐘, 空姐姐姐將登機證交到我手。Yeah…yeah….yeah!!!!阿媽我得左啦, 係呢到我要多謝我阿媽生得佢個女我咁鬼死蠢多謝晒多謝晒, 我由一個被罰既細路變身成為攞左奧c卡最佳男主角。

用盡我個個同佢主人一樣都係low battery既手機報告比屋企知今晚會到後, 機場之旅告一段落 – 我以為。