今日早起左,雙親都仲係度瞓緊,我又係度玩電腦,之後亞媽煮埋早餐俾我同亞爸,食完我又補打返前幾日既日記~

細佬返埋黎,食晏,食完亞媽話叫我陪佢返大陸探親...我仲諗住今日落元朗拎眼鏡添...

點幾就出左去~點知上到小巴先知自己未帶回鄉證,之後跑返屋企拎啦,當時正係溫度最高既時候,搞到我成身汗...上到小巴,個司機駛到勁慢,由天水圍到朗屏都要成4個字,可想而知啦...係水邊圍度仲要超載,因為我太高遮住左後座有個女仔,個司機以為無人,之後個女人唯有企係最後,估唔到小巴都有企位...好彩轉左彎係元朗廣場有人落,如果唔係我諗個小巴司機有排煩呀,皆因附近有好多警察巡邏...

最後成9個字先去到落馬洲...亞媽個樣黑晒...我都唔夠膽多出聲了...

過到皇崗,係咁搵巴士,d巴士費勁平,$1.5一個,不過無冷氣,成程都出晒汗...坐左成個幾鐘車程,最後都唔知係邊度落左,亞媽話過左..之後坐返倒頭車,再行左成3字路先到!

亞媽話今次去探個朋友,因為呢個朋友d仔女都係香港住,所以依家自己一個人住,因此要去探佢...點知上到去,先知佢個朋友係鄉下特登叫人黎深圳,早d出聲我地咪唔洗黎囉~我見無聊咁,落左街去行,搵下d巴士站咁,原來附近有巴士站係我地頭先經過....我地唔知仲用左好多時間添...最後去左吉之島行,買d燒墨魚丸食~上返去坐多一陣就走人了~

之後過東門,亞媽買唔到要買既野,最後坐地鐵返羅湖,亞媽先走,佢叫我搵巴士去皇崗,平d ma,佢話要趕時間返屋企煮飯,如果唔係都由皇崗返,最後俾我誤打誤撞搵到巴士返入皇崗,8點幾返到香港了~