在慶祝計劃裡，提議了古叔給驚喜媽媽，因此為古叔訂了99支玫瑰。
原來要擔起這束玫瑰一點也不容易，因為它很重，就如抱著一個重磅bb般。不過有得收，重些又何相干，總會有送花人來幫著拿。
<喜宴事件一：第一次幫媽媽化粧>
我放工去到酒家，原來只有一檯麻雀的客人在場耍樂中。於是我便著手拿出化粧袋，同時叫媽媽坐下。她一路坐一路說：唔駛啦！我擦左睫毛液啦！我答：坐地我幫你夾下佢，夾左起d嫁。
完成後，我再說：琴晚契妹打俾我，話今晚要化粧黎，我便跟她說女主角到唔化粧，你化咪搶晒鏡。所以我幫妳整d顏色上去啦！邊說邊將眼影盒取出。
弄完眼後，便打算跟她上胭脂。媽媽向後縮一縮說：夠啦，唔駛啦！我便一路拉番正她一路說：眼有顏色梗係連面珠都要上色啦，放心啦！我輕手d！(其實我根本對自己的手勢沒信心，因為我沒有正式幫人化過粧，更沒有幫媽媽試過粧，所以還是淡淡地好！)
<喜宴事件二：年紀排位>
在宴會中途，一群看著我大的阿姨們，神神秘秘咁叫我埋她們檯。原來妹妹姨想弄清楚他仔仔的年紀和我弟弟的相近否，所以便問我弟弟幾多歲。我便說：吓，話俾你地知咪即係知我幾大！，玲姐便答：我地都知你幾大啦！其實，咁又係，唔知確實都知大概。答案是差一節~4年。然後又問騏表弟大些還是我弟弟大些，嘻，我弟弟是表哥。再由強哥問咁你同啟明呢，我大些。阿姨們又問咁阿樂表哥同我邊個大些，我答阿樂，阿姨(樂表哥媽媽)直頭講左表哥歲數出來。
在你一言我一語中，唔知聽到誰人說幾時到你地結婚，我便答：樂表哥都未請飲幾時輪到我這個表妹。妹妹姨便答：邊有分，表妹先有咩所謂。我便說：唔好，梗係表哥先啦！
接著，到坐隔離檯的沙田大姨叫我，問我：金剛同我邊個大些，我答梗係金剛啦，佢係表哥黎。
<喜宴事件三：四美圖>
席間，舅母叫我同表妹及另外兩個表姐影張相，於是我便硬著頭皮去叫美玲表姐：
我 ：舅母叫我地同表妹影張四美圖。
表姐：又關我事！
我 ：唔知啊！舅母叫到咪影囉！仲有另一個表姐都叫。
表姐起來。我們邊行邊傾：
我 ：係呢，其實你同黃大仙表姐，邊個係表姐邊個係表妹，我淨係知你地兩個都係我表姐。
表姐：梗係我係表妹啦！睇個樣都知啦！
我 ：...................埋位啦埋位啦，表姐(對著黃大仙表姐)。
其實諗諗下，才記起在港的袁氏家族裡(不計在國內的大大姨一家)只有我們4個女但仔有9個，所以我們都幾矜貴，因為阿婆有5個女1 個仔！
<喜宴事件四：托兒>
唔知從那刻開始，我搖身一變成為了托兒老師，就好像是，啟雄氹掂晴欣來搵我開始。晴欣就閒來黏著我，順而啟雄及明明都會過來，就這樣我就被這三個小朋友圍住。
不過好開心你們肯黏住我，因為你們的媽媽是看著我大的，現在輪到我看著她們的小朋友大，日子過得真的快！
<喜宴事件五：敬酒>
在入席時我聽到有結婚音樂響過，因此坐席後我便問契妹：
我 ：你估一陣間駛唔駛敬酒？
契妹：你鍾意可以叫佢地播。
我 ：我唔係問佢可唔可以播，係我地駛唔駛？
契妹：咁你叫佢地播囉！
我 ：咁你係唔係陪佢地敬酒呀？
契妹：吓，唔好掛。
我 ：咁咪係囉，你都唔肯啦！
點知......在準備上翅的時候，就聽到了敬酒的音樂響起。我便即時放下筷子，與此同時已見待應奉著敬酒的酒來。我二話不說地就同契妹講：行啦，要敬酒啦。還跟手將酒杯遞給妳。
哈哈！多謝妳呀，好彩今晚有妳在，雖然無諗過自己唔係同媽媽坐，但為了要陪妳，又不好遺下明弟兄，所以變了有高高的妳和我坐，讓我可倚倚妳的肩，又可撓撓妳的手，還可搭搭妳的背，感覺真好！仲有就係多謝妳的snoopy：7-11~18及20號仔、電話頸繩、扭蛋、日本出的糖。
<喜宴事件六：爸爸>
只有二年級的明明突然叫住我，我便彎下身聽她說，她便細細聲的在我耳邊問：果個叔叔係唔係你爸爸(指著古叔叔)。剎那間我不懂反應，腦裡一片空間，不知怎說，千鈞一髮間便笑著答：係呀！
<喜宴事件七：舞池>
我這班長輩們一d都唔悶蛋，唔知點解佢地一玩都興起就會跳舞，仲要係這間酒家的卡拉ok設備不俗，音效不評(因為不懂)，只看到個大投射螢幕已經夠照，還有電腦選曲系統。除了跳節拍強勁的快歌外，還有跳過喳喳。最神奇的是志銘表弟居然拿咪唱歌，仲要唔只一首。連佢家姐即我表妹都跟我打眼色嘖嘖稱奇。不過玩得最勁的青叔因為要開工，所以來不到，若果不是......
<喜宴事件八：明弟兄>
真係要跟你說十萬個唔該及多謝。其實真的不好意思叫你，因為無叫你收錢。但抱著大家都係試下的心態：我試下媽媽搵影相的接受程度，而你則應該係試下影宴會相。便鼓起勇氣提出這個請求，多謝你答應。
怎樣呀！第一次影宴會相感覺如何呢！仲有要多謝你的snoopy蛋蛋，其實我仍在想緊好不好買！
<喜宴事件總結>
感謝神。
感謝神，讓我去酒家及歸家的路程都沒有下雨，因為拿著很多東西。
感謝神，讓我整晚有平安，雖然未入席前有小風波。
感謝神，讓我有力，因為在初中段已感到累累，其實可能是刹那間為晚宴擔心。
感謝神，讓我們一家開開心心的歸到家中(因為古叔沒有飲醉)，雖然最後發生令人擔心的一幕。
感謝神，哈利路亞！
