曾經有人話我比麻甩佬更麻甩

但我不太認同

你只可以話我比較了解及接受男人的麻甩

而事實上我的日常社交活動

幾乎佔了九成都是與麻甩佬進行的

「星期五冇女」最初是一位人夫推薦我聽（睇）的

我初初以為係一班年青毒男講吓女仔

所以興趣不大

後來人夫又再叫我聽

好啦！我本住一樣嘢如果有人強烈推介的話

必有其可觀之處

所以我就姑且聽吓

一聽之下

覺得呢個節目果然幾吸引

節目中有粗口其實無咩特別

講鹹嘢亦不是甚麼新鮮賣點

我反而幾欣賞佢地幾個麻甩佬

營造到吹水唔抹咀果種開心氣氛

加上佢地年紀唔太細

講嘅嘢有我嘅集體回憶

所以聽起來特別開心過癮

我有聽過性爺介紹刁民牛嘅賤男系列

講真真係爭幾皮

刁民牛只係講北上尋歡嘢（可理解為肥龍手記聲音版）

無錯係幾血肉，但唔多好笑

而且來來去去三幅被

所以佢嘅受歡迎程度已日走下坡

反觀「星期五冇女」就比較好笑及多元化

而且比較貼近時事民生

其中三個主持

都係做廣告創作出身

所以佢地講嘅嘢有好多 punch-line

論可觀性的確贏了成條街

呢個世界總有一些衛道之士話呢類節目教壞人

我真係好想話俾佢地聽

你唔聽呢類節目

佢地講嘅嘢依舊在社會上日日進行、天天發生

去認識唔代表你會去做

而認知往往是最好的人生教育

當然心智未成熟的人最好有人從旁指引

而囡囡們聽吓亦是好事

多 D 了解麻甩佬諗 D 乜

才能知己知彼

如無意外

今個星期五我會同 IT 仔及人夫

去現場睇呢個節目嘅直播

而家心情都有少少興奮和緊張

我係有 D 驚到時現場得我一個女仔

不過唔驚得咁多

反正我「星期五有仔」就是了

補番尋晚現場情況，我正縮晌暗角處