好耐無出現喇

呢排部署緊啲新計劃

等有眉目果陣，再同大家分享

至於股票方面

五窮六絕，最近我都休養生息緊

姥姥！銀泰我都揸緊貨

呢隻股形勢非常曖昧

我相信等阿里巴巴上市日子落實後

會柳暗花明又一村

我估大家都係想聽啲 juicy 嘢

話說早前端午節

老媽子忽然心血來潮，竟然嚟個 DIY 親自包糉

老媽子啲糉都算足料，有綠豆、鹹蛋、蝦米、五花腩、干瑤柱....

我見 W 君成日請我食嘢（邊個 W 君，請睇番之前嘅網誌啦 ）

就諗住借花敬佛，拎兩隻阿媽愛心糉俾佢嘆下

果朝早，我一早 sent 咗個短信俾佢

W 君隨後來電，話有人請食糉，自然卻之不恭

於是我地就約食晏，我順便拎埋兩隻糉俾佢

過咗一個禮拜，W 君又約我食晏

席間，W 君話想唔想聽佢對隻糭嘅 comment

我心諗︰大家一場相好，佢應該好客氣，係咁易讚番兩句啩

點 Q 知佢一開口，就話隻糭完全唔合格

我其實無嬲佢彈我老母啲糭，不過有啲突兀佢講嘢咁直接

佢話第一，隻糭烚得唔夠火喉

我本能為我老母分辯，話啲糭已經烚咗兩個鐘，我都嫌隻糉林咗啲

但佢話糉的精髓，就係糯米同啲料融為一體

而我阿媽啲糭因為烚得唔夠時間

所以食起來有糯米還糯米、料還料之感，完全無法二合為一

我正不知如何辯駁之際，佢又話糉入面舊五花腩唔夠肥

合格的糭，烚完之後，舊五花腩應該係融化哂

啲油完全滲入啲糯米裡面，令隻糭充滿油香

而且隻糉又紮得唔夠實，所以食起來唔夠質感云云....

再重申一次，我真係無嬲佢彈我老母嘅糭

我只係覺得呢個男人好識食（唔怪得佢揀我啦.....哈哈哈....just kidding ）

返到屋企，我講俾阿媽聽人家的評價

阿媽反應出奇地平靜，淡然地說︰咁下次包糭咪拎俾佢 

故事仲未完

早兩日，W 君又約我食晏

平時佢多數都會就我來鑽石山食晏

點知今次佢約我在九龍城會合

我起初也不以為意，後來先知佢別有用心

佢帶我去一間叫添樂園嘅老牌茶餐廳食嘢

呢間茶餐廳，聽聞最出名係煲仔飯

當然呢幾日天氣咁熱，煲仔飯自然欠奉

一入到去，W 君就叫咗隻裹蒸糭俾我食

佢話要俾我領略何謂一隻合格的糭

添樂園的糭，果然符合到 W 君之前所講的要求

料同糯米水乳交融，合二為一

烚完之後的五花腩殘骸，入口即化

雖然我始終認為老媽子的糭比較好食（因為我唔太鍾意食太林嘅嘢）

但我心裡其實好感動

因為世上有一個人願意帶你去領略在他眼中視為優質的東西

呢隻價值 $44 的裹蒸糭好唔好食並不重要

重要係有個人努力地去讓你進步、讓你見識呢個世界....

那天，我吃著添樂園的裹蒸糉

在我面前的，彷彿是另一隻多情糉....