真係年紀大、機器壞

蒲咗兩晚，成個人散哂

星期五晚去現場睇「星期五冇女」

個節目十二點半開始

十二點入席

十點半約咗人夫在荔景站等

跟住再去南昌站 join 佢個 friend

佢個 friend 有少少爛佬 feel

原來卻是個社工

個人幾 nice、幾好傾

十一點幾去到銅鑼灣站

小那星竟落起雨來

左拐右轉終於去到人網總部樓下

呢度就係人網樓下喇，都幾難搵

之後再與 IT 仔會合

跟住就上去人網二樓嘅總部喇

因為早到，所以我地晌接待處度等入場

果時只有五、六個麻甩佬聽眾在現場等候

我都有少少驚果晚得好少人出席

當時我見到幾個人網嘅主持

講真，我發覺佢地全部真人好睇過上鏡

這是有點始料不及

講番少少前因後果

因為呢個節目嘅其中兩個主持不滿監製唔重視佢地

所以想劈炮唔做

節目監製想補鑊

於是同主持來個打賭

如果有一百個聽眾嚟現場睇直播

主持就會繼續做落去

四位主持，由左至右︰Noel、鱷魚、阿東、歷蘇，就係 Noel 同鱷魚想唔做

接近十二點，我地終於入去直播室

間房大概四百幾尺左右

旁邊已放了一排紅酒任人飲

死人 IT 仔話怕影到佢

小那星竟然問果度嘅工作人員拎口罩

真係失禮死人

 現場紅酒任飲，我飲了一杯左右，味道都 OK

未幾主持陸續進來

我自己雖然見慣藝人

但見到幾位主持的真身

亦同樣感到興奮

尤其其中一名主持 Noel

真人真係超型

身形好、輪廓深、把口又得、又有米

真係難怪食女無數

前來的聽眾亦越來越多

當中亦有不少女性

估計超過百五人

群情非常洶湧

我地本來有凳坐

後來因為人太多，就只好齊齊坐地下

現場氣氛好好，一眾麻甩佬如痴如醉

節目終於開始，氣氛超好

主持更當眾除褲露股

真係大開眼界

 主持玩到癲咗，當眾露股

果晚整個節目盛況，有興趣自己睇

節目做到一點半

我返到屋企接近三點

臨走前，同其中一個主持傾咗一陣

佢原來同我係同行

佢叫我在 facebook add 佢

話第日一齊合作云云…

呢次係一個幾得意的經歷

我亦覺得主持講得好好︰

「香港男人要重振雄風，做番個敢做敢當的真男人！」

下次再講翌日星期六去睇的一場政治花生騷

同樣係一個不錯的體驗