先旨聲明

我唔係乜嘢專家

我只係想同大家分享一個日日都發生緊嘅民生小故事

四年前，我要搵地方搬

時為金融海嘯過後

我亞媽話不如平平地買層上車樓

所以當時就集中火力

在荃灣某出名上車屋苑搵地方

果陣我個朋友 Michael 都陪我一齊睇樓

那時候佢啱啱結婚

我阿媽就隨口問佢

你結咗婚有頭家，不如都買番層啦

果陣四百多呎嘅單位

都係百一、二萬左右

以 Michael 同佢老婆當時嘅能力

絕對可以拎得出首期同埋供得起

但 Michael 嫂嫌果個屋苑舊（其實當時都係廿八、九年樓齡）

話唔值呢個價錢

所以佢地結果都係無買到

取而代之係用六千幾蚊租屋

四年後嘅今日

樓價升咗倍幾

Michael 搬過一次屋，家裡亦多了一個小朋友

而家俾嘅租金接近九千

呢個時候，Michael 嫂卻嚷著要買樓

但以佢地而家嘅能力，則有點勉強

Michael 一個月總要同我吐幾次苦水

話因為買樓一事

同老婆成日嘈交…

當然事後孔明自然睇得通透

不過樓係要嚟住

如果真係有需要而又能力負擔得起

買樓其實真係比租樓好（尤其在低息環境及各國 QE 政策下）

安排及計劃好按揭

樓價之後的升跌，根本與你無關

當然要撇除樓價大幅下跌而產生負資產，銀行要追番差價

但我認為見過鬼都怕黑，政府會設法不讓此情況再發生

我地單身剩女

來去自如

有景之時可以住好 D

無景之時可以返娘家黐食黐住

但有了家庭同小朋友

安穩才是首要考慮

現代人的苦惱，往往係將自己自住的居所當作投資項目

而家連買居屋單位都要估佢將來有無得升值

安居概念已被嚴重扭曲

咁仲點會有運行？

我常認為一個人最緊要思路清晰、目標明確

外面環境變化之快，你根本無可能跟得到

唯有在自己的目標據地內審時進退

Michael，祝你好運！