晌 24 小時之內

我得知 ex 已結婚生女

跟住俾條第一次見面嘅麻甩送返屋企

跟住有個朋友話我知有個識了多年的人原來一直好鍾意我

24 小時，除了時鐘行了兩個圈，原來仲可以發生好多嘢

ex 單嘢我就無謂講喇

分開後已是人鬼殊途

我有我嘅生活，佢有佢嘅扶碌

祝佢一路好走

相信大家比較有興趣聽下試菜報告

話時話，當年在亞濁嘅試菜報告

可以話係小妹嘅起朵之作

近年從良，已經無乜寫報告，但唔代表我無出去試菜

話說星期日果晚，IT仔叫我出去飲嘢

同場仲有兩條麻甩佬，姑且稱之為 L 君同 K 君

簡單來講，L 君係翻版林超榮

無論個樣乃至說話動靜，有九成似林超榮

佢坐低無耐，就語出驚人

佢話︰Susan，你唔係靚女，但係我好鍾意同你傾計

小那星，你咁講即係乜 X 意思呀？！

我唔係靚女就係人都知，你駛唔駛 up 到出口呀？！

唔係念在你轉數快兼夾講嘢幾搞笑

我真係啋你都有味

不過最終 L 君都抄我牌問我攞電話

超！男人！個個都係一舊樣！

而於 K 君，生得高高瘦瘦（有成六尺高）

開頭 L 君不停講嘢，K 君都係笑下、搭下咀，仲未見到佢真章

後來 L 君早走，K 君就嚟料

佢竟然用全天下最老土 BUT 最 WORK 嘅橋來搭訕

佢話︰我識睇掌！！！

而我貴為一代才女，理應識破奸計，識得嗌唔好

奈何飲咗幾支啤酒，斷判力大減，加上 ex 單嘢，有點想自殘糟塌自己

我竟然話︰咁你快啲幫我睇吓啦！

跟住我就自動獻身，俾佢睇掌

佢好認真，捉住我隻手，一輪拿捏研究

好啦！摸完一輪手仔，諗住可以知道一啲天機

小那星，佢竟然話太黑睇唔清楚

我自然大表不滿，依娃鬼叫

跟住佢就淡淡定笑住講︰俾你問一個問題，只可以一個！

嘩！高手呀！識得咁樣玩嘢

好！正如獅子佬所講，難得遇到知音人

你玩嘢時我梗係同你玩落去

一個問題，好！我就問你一個問題

於是我就問……（待續）