新年之後第一次開筆

寫嘅自然離不開食與色

真失禮，我以前識嘅仔仔

一係老粗、連中五都未畢業

即使大學畢業，做埋博士，都冇乜品味同風度

而尋日，我有幸領略到咩叫做品味

話說尋日同某仔仔食晏，就姑且叫佢做 W 君啦

地點則是尖沙咀某間樓上土耳其餐廳

十二點去到，餐廳無乜人

地方算是清幽，布置充滿中東風情

椅子是那些大大張，椅背雕花、椅面是中東波斯織綿花紋的宮廷式椅子

侍應係中東模樣的人

我隨口講句︰唔知佢地識唔識聽廣東話

W 君笑笑口講︰食物係世界語言，有 menu 就點到菜

坐了下來，三分鐘都未有人走過來招呼

我正想揮手嗌 waiter 之際

W 君又講，這裡不是港式茶樓，樣樣嘢都要快快快

入到一間異國人開的餐廳

就嚐試領會下人家的文化

這些餐廳節奏都比較慢，我們何不靜心等人家自己行過來招呼

我望住 W 君，覺得佢真係唔同我以前識嘅仔仔

等待期間，W 君問我知唔知 Ottoman 帝國嘅故事（因為間餐廳個名有 Ottoman 呢個字）

我話我讀西史只讀到中三，唔係好知

跟住佢就講咗啲 Ottoman 嘅嘢俾我聽

你一定會諗，挑！你咪咁 X 天真啦

佢一定係嚟之前做定功課，諗住晌你面前騷 quali 啦

如果佢真係咁，我就唔會花時間寫佢啦

間餐廳係我臨時決定去嘅

佢根本無時間去睇維基扮有料 

到點菜喇

我自問英文麻麻

所以就由 W 君發辦

講真，識講流利英文嘅男人好多

但識得輕描淡寫地講英文的男人

我真係未見過

佢用一種好閒悠、好 causal 的腔調

先問個 waitress 有咩好介紹

個 waitress 用好重口音的英文講咗一大堆嘢（其實我都唔係好聽得明）

W 君又用好滋陰的口氣講了一些幽默話（我又係聽得唔係好明）

搞到個 waitress 笑逐顏開

我望住 W 君，覺得佢真係真係真係唔同我以前識嘅仔仔

菜到喇

先是例牌沙津 + 餐湯

接著是一碟燒牛肉粒 + 一碟羊肉餅

味道算是不錯

但重點係一路食，W 君一邊同我講世上最貴的香料是番紅花、

梁振英應該用點樣嘅政治智慧去處理菲律賓問題、

左軚車點解比右軚車更符合人類習慣、

點解意大利的咖啡會係咁細杯…（話題太多，不能盡錄）

這次的午餐，我真係大開眼界

有人話過，當你睇過 blu-ray 碟，你就無可能再返轉頭睇 DVD 碟

我對 W 君唯一的挑剔

就係同佢食過飯，我都怕以後會返唔到轉頭…