今日係情人節，雖然無人約我

今晚會返屋企食住家飯

但係我卻心中暗喜，因為一切事情已在我意料之中....

話說 10 號那天同 W 君食完土耳其餐之後

我就暗自思量，仲有四日

14 號果日，W 君會點呢？

我同佢其實未算開始，只能算是投契

但以我了解佢嘅性格

佢係一個好有自己想法但又好含蓄嘅人

亦係無把握唔會出手嘅人

而佢搵我嘅頻率，通常每一、兩日一個電話，一個星期食次飯，非常之穩定

而照我嘅估計，14號果日，佢一定唔會有任何動作，理由係…

第一，佢唔係一個會從俗嘅凡夫俗子

第二，我地亦未去到果一步，晌呢啲敏感日子出手，一個唔覺意便弄巧反拙，隨時朋友都做唔成

 其實我亦非一般港女

我一直認為，情人節係商人的布局，其他乜節物節也是如此

巧立一個名目，借意發揮、大肆宣傳、編撰美麗的故事和說法

芸芸眾生在自願或非自願情況下

花大堆大堆鈔票去消費

以我咁低層次嘅人都明白這點，何況是 W 君

即使我有男友，我也唔介意唔慶祝情人節

因為兩個人相處得和諧開心，日日都係情人節

返番正題

尋日，W 君早上 11 點左右就打電話來

話有個電話 APPS 好啱我

我好自然話︰咩 APPS 呀？你俾 APPS 個名我，我自己去 SEARCH

佢竟然話直接嚟搵我再講

我心諗，這也算是借口嗎？

OK！我就睇下你搞邊科

一個鐘頭後，佢來到我 OFFICE

佢知我玩緊股票，帶了本經濟一週的雜誌俾我

講真，我覺得佢送本雜誌俾我比送紮花更讓我感動

因為佢真係知道我真正嘅需要

我問佢果個係咩 APPS

佢講咗個名叫我自己搵來下載

我話︰乜你唔係下載咗咩？開嚟俾我睇下先啦！

佢話︰SORRY！除咗手機內置嘅，我從來唔下載 APPS...

咁佢真係無講大話，佢真係連 WHATSAPP 都唔裝

我心諗︰你無下載個 APPS，你又點知好啱我呀？

我當然無講出嚟啦

咪照佢講果個名去 SEARCH 囉

挑！原來只係一個好普通嘅占卜APPS

有塔羅、有求簽、有星座生肖之類…

我個心起初暗妖︰唔係化！天寒地凍又落住雨，你特登走來叫我下載個占卜 APPS？！

但回心一想，就係因為咁無聊，先至更突顯果份司馬昭之心

後來我 DEL 咗個 APPS

佢又講咗個網站名，叫我用電腦開嚟睇

結果又係無料到

但重點係，佢坐晌我身邊同我一齊睇個網站

而佢又唔知有意定無意

將佢嘅手機不偏不倚地壓喺我嘅手機上面（我地兩部手機 SIZE 相同）

如果我心邪啲，真係以為係性暗示

人地脷疊脷，我地就機疊機，認真騎呢....

跟住就一齊去食晏

今次食越南嘢

佢又係一路食一路講咗好多冷知識俾我知

我知道我應該估計無錯

佢可能係快人一步

同我提前過咗一個唔似情人節的疑似情人節