我愛你
今日唔係父親節，亦唔係Family Day，呢兩日我成日都[無端心痛]，可能係太擔心自己既將來會係點，驚對唔住某D企左係我後面幾十年既人，叫得幾十年，呢個人當然稱得上，配得起．
爸爸，係我心目中係一個好叻好叻既人，因為佢算稱得上白手興家，自爺爺過身之後，爸爸冇攞過任何爺爺留下的產業，一個人咁靠自己雙手挨過左唔少風風雨雨，當時我相信爸爸已經希望自己個仔，將來會有前途，會係一個孝順，叻，聰明既仔．今年我都十幾二十歲啦，我未出世時爸爸已經對我充滿期望，我係咪將會令佢失望呢？
我係一個幾鍾意影相既人，今日睇番以前Ｄ相，發覺對上一次同爸爸單獨影相既事，應該都有差唔多十年前啦，我知我自己忽略重視呢個人，以為佢對我好係應分既，其實我知我對你好先係應份既．
呢個男人，朝朝早好早咁番工，到左夜晚又好晏先番，出面受老細氣，番到屋企個仔又唔聽話，如果我係呢個男人，我會好失望．宜家我覺得自己好對唔住呢個人呀，日後我要為左佢，為左媽媽．要努力向住目標奮鬥．
但願家中兩老，幸福快樂．但願至親身體健康，但願我地一家人可以愛多八十年．