等左幾日, 終於等到《卡通王國》(4CD) 推出, 今日即刻托人幫我買.
先黎個封面先:
我買左係限量版, 有埋耳機, 但貴$40, 有d 肉痛.
跟住係CD盒攤開, 封面連封底:
反轉佢, 就會見到4隻CD, 本身碟面d 字係無排得咁整齊, 係我特登執好黎影相:
曲目可以參考封底:
睇完圖, 當然又要聽下老人家評下呢套兒歌cd啦.
先選d 特別的歌曲黎講:
碟一:
1. 足球小將
相信有買開兒歌專輯, 都會同我一樣, 估呢首係插曲.
而當我欏到隻碟, 聽歌前, 打開歌詞書睇時, 見到歌詞居然係主題曲,
諗住都多數係電視劇o個個的混音版, 無理由搵到原版咁勁卦, (唔想希望越大失望越大嘛).
但都算有新意丫!
點知一播隻碟黎聽, 原來又係插曲,
真係要鬧整歌書o個個, (唔係鬧揀歌o個個)
4. 現代足球小將
動畫名應該係《足球小將Goal！》
5. 伙頭仔昆布
一直出碟都係用呢個名，而電視時用的名係《嘩！伙頭仔昆布》
8. 龍珠
歌名應該係《龍珠94》，呢個唔係電視版，係《戰鬥力強化再造版》
唉，幾時先有原版？甚至陸家俊版？
10. 你讓我找到了未來
一直出碟都係用呢個名，而電視時用的名係《你讓我找到未來》（冇「了」字）
11. 新世紀福音戰士
呢首都係卡通歌？咁鄭秀文首《叮噹》算唔算？
12. 跅跅步哈姆太郎
原唱係Twins, 但居然收錄2R翻唱版，仲有大把卡通歌丫，做乜鬼搵呢首？
唔通揀歌o個個以為2R係原唱？
順帶一提，當年《卡通歌王》（又係環球出）收錄的頭四首翻唱歌，已經俾好多人鬧，估唔到案件重演．
15. 時代節奏
當年華納出的兒歌專輯華納閃電傳真機No.1兒歌大串燒 入面的《時代節奏》，變左另一首流行曲．
開頭我都驚今次照抄錯，好在平安無事．
碟二
06. 人人愛愉快
《得意快獸仔》主題曲，不過呢首唔係動畫喎...
08. 美少女變身
4隻碟入面，我最期待就係呢首歌，因為從未有任可專輯收錄呢首歌，包括流行曲專輯．
而且，網上亦無流傳電視版的長版，
加上由於當年我處於兒歌頹廢期，所以係連聽都未聽過完全版的．
聽到首歌當然開心，但本歌詞書呢．．．
首先，呢首係《美少女戰士S》的主題曲 插曲(感謝網友馮志榮於留言指正)，
即係第三輯，而唔係第二輯的《R》．
另外，歌詞好多錯，而好明顯，係照抄網上而家最流傳的錯版，而無做過任何校對．
為了不再以訛傳訛，我今晚就立刻為這歌製作歌詞頁放進兒歌收容所，以正視聽：
http://users1.jabry.com/election/ks/sailorSed.html
12. 情誼心中印
呢首歌極受歡迎，而今次係第一次推出CD版，值得鼓舞．
14. 每點愛都記住
一直出碟都係用呢個名，而電視時用的名係《每點愛都記「著」》
碟三
1. 超人的主題曲
《超人迪加》唔係動畫喎...
3. 宇宙大帝
又再借機教育下新一代，呢首歌的原唱係威利，張國榮係翻唱．
http://www.youtube.com/watch?v=ChVMuOrtcqY
14. 冰河戰士
呢首歌係唯一首，唔係無線播的動畫的歌 （唔計《新世紀福音戰士》）
呢套動畫係佳視播，亦係全套碟入面最舊的歌，新一代未必知乜野係佳視添．
希望黎緊的兒歌集，可以搵埋亞視，有線各電視台的兒歌，動畫歌
碟四：
10. 正義
又係warrior mix, 幾時先有電視版？
12. 腦波子
又係純主題曲版，希望插曲都有機會再推出．
總結：
包裝方面好靚，歌書，碟面等設計亦唔錯，
最抵贊的，係封面的動畫名，用返動畫原本的設計，
好有心思，好有懷舊感覺，直頭可以話係令人感動．
揀歌方面，有好多首之前未ｏ係兒歌專輯出現的動畫歌，
例如《達爾大冒險》，《虎威戰士》，《海》等，令人驚喜，
証明揀歌的有用心思，唔係只從舊兒歌專輯度搵歌．
《情誼心中印》雖然曾經收錄ｏ係兒歌同流行曲專輯，
但今次係首出推出CD版，有復刻感覺．
而《美少女變身》更加係首次推出，又一抵讚．
大部份經典動畫歌都有出現，但要出第二輯的話，
亦有大把好歌可以選擇，甚至俾我留有一手的感覺，
特別希望係一ｄ未推出過的動畫歌，都可以好似《美少女變身》咁重見天日。
若果要講有乜不足，最差的當然係翻唱的《跅跅步哈姆太郎》同埋無關的《新世紀福音戰士》
另外，亦有《超人迪加》同《得意快獸仔》亦唔算係動畫，而係特攝．
其實會唔會考慮出套「特攝」歌集呢？都有唔少歌咖！
歌曲編排方面，我睇唔出分碟或者同碟內的歌序有乜意思，多數係隨機，
若果可以因應年代，或者動畫種類，或者歌曲種類等分類及排序，會更好．
歌曲資料方面，全部有講明係黎自邊套動畫，
但若果係插曲的，如《一股歪風》，講明係插曲會好ｄ，
否則會令人誤會都係主題曲．
全碟最差的，就係歌詞，無標明重唱部份，而且每首歌詞都係一段過，唔分段．
《足球小將》插曲變左主題曲歌詞已經唔掂，
最令我不滿的亦係《美少女變身》照抄網上錯版，而無校對過．
希望下一次做好ｄ．
（或者搵我義務幫手都得）
附錄: 文字版曲目:
CD 1
01. 足球小將(足球小將片尾曲) - 張衛健
02. 美少女戰士 - 王馨平 湯寶如 周慧敏
03. IQ博士 - 梅艷芳
04. 現代足球小將(足球小將Goal) - 李克勤
05. 伙頭仔昆布 - 草蜢
06. 藍精靈 - 小太陽兒童合唱團
07. 數數小精靈 (寵物小精靈 插曲) - 陳浩民
08. 龍珠94 (混音版) - 張崇基+張崇德
09. 黃金戰士 - 胡渭康
10. 你讓我找到未來(高智能方程式) - 草蜢
11. 新世紀福音戰士(新世紀福音戰士) -楊千嬅
12. 跅跅步哈姆太郎 (哈姆太郎) - 2R
13. 寶貝甜心 (媽媽是小學四年生) - 湯寶如
14. 忍者 (忍者小靈精) - 小太陽兒童合唱團
15. 時代節奏 (童夢) - 劉錫明
CD 2
01. 夢中天使 (長腿叔叔) - 唐韋琪
02. 我係小忌廉 - 戴蘊慧
03. 多拉A夢 - 陳慧琳
04. 問題天天都多(櫻桃小丸子 片尾曲) - 歐倩怡
05. 小甜甜 - 路家敏
06. 人人愛愉快 (得意快獸仔) - 楊千嬅
07. 皇家雙妹嘜 - 歐倩怡
08. 美少女變身(美少女戰士S 插曲) - 陳琪
09. 愛心一百次(飛天小女豬事丁) - 戴恩玲
10. 命運鬥士(鎧甲聖鬥士) - 張衛健
11. 神秘的花園 - 何詠琳
12. 情誼心中印 (龍貓) - 江欣燕
13. 超人小子 (超人小子) - 黎瑞恩
14. 每點愛都記住 (娛樂金魚眼) - 車沅沅
15. 降魔者 (仙魔大戰) - 劉彩玉
CD 3
01. 超人的主題曲 (超人迪加)- 陳奕迅
02. 城市獵人 - 劉德華
03. 宇宙大帝 - 張國榮
04. 千年女王 - 露雲娜
05. 魔法咕嚕咕嚕 (咕嚕咕嚕魔法陣) - 滕麗名
06. 聖鬥士星矢 - 譚耀文
07. 達爾大冒險 - 蘇永康
08. 戰士高狄安 - 蔣慶龍
09. 忍者亂太郎 - 鄭嘉穎
10. 魔法時代 (魔動王) - 曾航生
11. 跟你啄一啄 (福星大咀鳥) - 李彩樺
12. 伏魔小皇子 - 梁漢文
13. 無名小子(伙頭智多星) - 黃凱芹
14. 冰河戰士 - 黃思雯
15. 劍神傳說 (反斗劍神) - 許志安
CD 4
01. 傳說 (千年女王 插曲) - 露雲娜
02. 百變小櫻 (百變小櫻MAGIC咭) - 曾嘉莉
03. 足球小旋風 - 李克勤
04. 爆裂旋風 (爆旋陀螺) - 郭富城
05. 超速龍球 (超速搖搖) - 方力申
06. 超級小黑咪 - 陳慧琳
07. 小丸子的心事(櫻桃小丸子 片頭曲) - 何韻詩
08. 變出我精彩(七小花) - 2R
09. 彈珠人的愛心炸彈 (BOMBOM彈珠人) - 楊千嬅
10. 正義 (無敵3x1) - 黎瑞恩
11. 虎威戰士 - 林子祥
12. 腦波子 - 陳美齡
13. 四驅小子 - 吳婉芳
14. 一股歪風 (電子神童 插曲) - 梅艷芳
15. 海 (冒險少女娜丁亞) - 吳國敬
| 
