今日又撘的士返學...唉... 返到去開完咪就要守locker...啲人就擅自拉開條鍊自出自入，如果可以比佢哋咁，咁要條鍊嚟做咩!?算啦~都冇咩嘢，之後就有個F.2既女仔(好細粒，都唔知到唔到我膊頭)自己拉開走出嚟，我都已經好聲好氣又好好禮貌咁同佢講"同學，呢邊唔出得，要喺嗰邊出。"佢就呆咗一呆，話"我鍾意喺度出呀!唔得咩!"，仲要嗰樣串到死! 嘩!激到我呀!諗住留佢喺度，點知佢一枝箭咁走咗去排隊，好彩我認住佢，早會巡嗰陣好嬲，大概知道佢喺邊，又比我揾到佢，巡第2次巡到一半捉佢!!!佢啲態度都唔係好ga~最後我記咗佢籃紙，今次係我做咗咁多個月prefect以嚟第1次記人藍紙。後尾佢班主任何sir都走咗過嚟問我咩事，佢講嗰句"佢咁樣做得就預咗有咁既後果"，講真，如果佢唔係串我，我都唔會話記住佢記佢藍紙。可能我真係嬲得濟，我真係要用返prefect上嗰啲堂學咗既嘢，啲EQ~不過過咗陣都冇咩嘢，繼續嘻嘻哈哈~

上堂~冇咩特別~今日同林智康夾咗陣，今次大家都進進步咗~希望到時可以順利通過~

放學冇去到choir...想早啲返屋企~但係好多同學仔放咗學去買朱古力~因為聽日情人節喇~ 有啲仲自己整tim~好勁好勁~我相信佢哋一定可以成功送到出去ga~我嗰啲就...是但啦~送唔送到都唔緊要lu~可以自己食~ 不過都拎定返去~

返到屋企，同媽咪講咗今朝件事，佢竟然講到好似我唔應該記佢藍紙咁，好似我錯咁...我真係唔知佢想點...錯既唔係我，唔通我要驚佢唔記佢喎!本來已經唔嬲，又比佢講到嬲，好!化悲憤為力量!做功課!