今日係結業日喔~7點8就返到學校準備練歌，本來琴日練完歌返到屋企唔知點解完全唔記得咗嗰2首歌點唱，但係今朝搭車嗰陣又醒返起點唱喎~真神奇~~~晨早流流喺hall開聲，感覺都唔係好開到，之後落咗操場巡班，巡完之後好唔放心，因為我仲未試咪，所以巡完溜走咗，上返hall，之後啲程序都好快，好好好緊張...一出到去唱嗰陣又唔知做咩竟然無啦啦伸脷...我都唔知自己做咩，總之2首都唱得好細聲。

小息嗰陣miss lee好激動咁走埋嚟係咁話:"你唱得好好聽呀~你唱得好好聽呀~"我成個人呆咗...之後佢又問:"你有冇唱ga?"，下...呢句好有問題喎...唔知我有冇唱又咁講，想點呀!?後尾問返人，原來啲人隱約都聽到我把聲，開學又唱。

之後班務時間，mr.wan訓話一輪，犯眾憎同學又喺度惜啲兒單打人哋，真係...唉...之後自己又唔知嗰死字點寫，又以為自己好得，好串得咁，講埋晒啲痴嘢，激嬲咗mr.wan，之後比mr.wan當住全班噴佢，跟住同學仔們又起哄，佢真係自己攞假嚟丟...救唔到...今朝佢哋呢一男一女又吵交，一日一大交，嗰男既扮晒狗咁撲去嗰女度，之後比嗰女既勁打一餐+2人喺班房破壞一輪，最後放學好返，日日都係咁，公式嚟ga~

放學同葉傑去咗揾miss to，是關8月某2日補課同a.maths撞咗...miss to係咁講，講咗好耐，最後佢自己去咗揾朱sir傾，佢話傾唔掂揾黃副校...好似好大件事咁...之後同alice+銘去何文田食lunch，跟住去咗西九龍中心行，色魔都嚟咗~係咁講笑，笑咗好耐，比佢哋話我白痴...

聽日返學校on duty，中一新生註冊，一啲都唔期待，我只期待中六新生註冊啫~呵呵呵~