同大家分享返我上年8月既青島之旅啦~!!

8月24日 (星期6)

真係唔知點解，一直都好想去青島呢個地方~覺得個度應該好有異國風情~!!

等左咁耐，終於等到出發啦~!!!今次仲係我同Emmy第1次2人出走~好興奮呀~!!!

朝早8點鐘Emmy係TKO坐的士黎Lam Tin會合我~!!一出門口，好大雨.....大到癲~!!

係的士度，我又比Emmy話我一輪咀唔停口~sorry，我實在太high啦~

去到機場，寄左行李~我地去左翠華食早餐~食完就開開心心上機~

今日班機好full，好似有3個旅行團......成程機，真係好嘈~!!!

嘈到Emmy發脾氣，哈哈哈~但呢d野係完全影響唔到我心情既~!!!

差唔多2.30pm到達目的地，老實講，兩個女仔去大陸地方，確實係有d驚~

所以我萬事都要好小心~!!

一出機場，例牌會有好多人衝埋黎問你地去邊﹖要唔要車呀﹖我就一定會揀去返的士站坐車，起碼個度有人登記車牌，感覺safe d~!!!

因為的士尾箱唔夠位，於是我地其中一件行李要放後座，我就被逼坐上前座~

一上車，我就見個司機不停打電話，同對方講﹕ 麒麟皇冠大酒店 (呢間係我地住既酒店)

我個一下心諗﹕唔通你搵d partner幫手打劫我﹖ 於是我全程更加唔敢鬆懈~!!!

突然個司機隊左佢部Nokia過黎我度，用國語同我講﹕  你能不能幫忙發一個短訊，告訴他，我們要去麒麟皇冠大酒店，因為我在開車打不到短訊~等會我有朋友要到機場，所以我叫他到酒店那邊等我......

我答佢﹕ 對不起，我不會打短訊~

識都唔幫你打啦，唔理你真定假，一陣我一掂你部Nokia，我暈左咁點算呀﹖ 

之後安全到達酒店，酒店雖然舊舊地，但乾淨企理就ok啦~同埋揀呢間酒店最大原因，係因為近青島啤酒節會場~

我地兩個係酒店房休息左一陣，就出發去啤酒節~

近就真係好近，行都好似係十分鐘~!!去到門口，會見到好多大陸黃牛黨，$20元入場劵都有黃牛﹖大陸真係咩都有~

我地去返official既ticket counter，買左飛就入場啦~!!我可以同你地講，失望 x 10000000000~!!

唔同品牌既啤酒分別係一間間獨立屋仔咁，人客可以係入面買酒飲，買野食.....仲可以唱歌跳舞~

場內所播既歌曲，分別有﹕ 今夜你會不會來 (disco版)，血染的風采等等~!!

試問聽到呢d歌，又點能夠唔興奮呢﹖行左十五分鐘，我已經好想走~

但今晚我地約左Emmy朋友dinner，佢朋友呢幾日咁岩黎左青島擺展覽~我地好辛苦先捱到7點幾，等到Emmy朋友 - 小雲 & 佢一個同事 - 小山會合埋我地，d名真係好特別~

我地4個人終於叫做係啤酒節買左d串燒，買左d啤酒飲下~叫做黎過有交代啦~

之後我地一行4人去左食seafood，人地話青島seafood好食又抵~嗯.....味道我就覺得不過不失啦，價錢就真係平到笑，4個人食左227元~

食完都差唔多10點，兩位男士好有風度咁陪我地行左返酒店先，之後佢地先自己返酒店 <-- 好彩我地都住得好近~

*岩岩相識既呢兩位男士，我同佢地好似好熟咁，可能人在外地，感覺都易混熟d~返酒店前，我同小山仲一人買左枝雪條食~!!haha

8月25日 (星期日)

今日一早起身，先試試酒店個早餐先~上到36樓食....nice view~

望住個海水浴場，好有feel~野食又真係唔錯wor~!!Emmy最鍾意飲佢杯西柚汁~

食飽之後，我地兩條友又返左酒店房hea~haha，又訓左一陣~之後就起身出發去奧運帆船中心~

估唔到今日小雲偷懶，陪我地兩個女仔癲~當初個plan真係同佢地食一兩餐飯ga咋，最後竟然係一齊去做遊客~

今日我地好叻叻，係酒店坐的士去展覽館接返小雲~我發覺係青島最難既就係搵的士，所以係酒店坐的士係最穩陣，因為通街都無車~!!

本來我地想去食韓國野 - 土大力，點知去到發現.....執左~!!好失落~!!!

於是叫司機放低左我地係附近商場，係入面是但咁搵左間韓國野食~連間野個名都唔記得啦，不過d野食都幾ok~

尋晚餐seafood係小雲埋單，今日餐韓國野就等我埋啦~話晒岩岩識，無理由要人地請食飯既~!!

呢餐韓國野差唔多300元，仲貴過餐seafood~

食飽之後我地係商場行左一陣，買左好多食得既手信~見到有斯里蘭卡茶葉，好想buy，但心諗﹕無理由係青島買斯里蘭卡茶葉,,,,,,,

點知小雲大我﹕一人買一盒呀......就咁，比佢大左~!!!

我地拎到一袋二袋........之後就去左奧運帆船中心，咁岩日落時間，個景好靚~!!

青島雖然係大陸地方，但地方真係好乾淨，你係地下唔會見到有一舊垃圾或煙頭，同埋佢地環境綠化真係做得好好~

你真係唔覺得自己係大陸地方(除左見到殘體字)，so far d人又真係ok~佢地有禮貌d，同埋個樣純良d~!!!

我地3個人好靜咁散步，沿住海邊行，真係好舒服~

青島溫度都有34，但我無出過汗，因為一d都唔焗~!!!爽呀~!!!

行到差唔多8點啦，我地3個人去左小雲極力推介既海底撈火鍋等位，真係好多人~等左一陣，小山就黎會合埋我地~

呢間打邊爐，一個字 - 讚，湯底好味，野食好味，又用ipad點菜~勁~!!!

今晚仲見識左功夫拉麵，有個功夫小子出黎係咁打係咁打，哇哈哈哈~讚爆~!!

呢餐埋單幾錢﹖ 我都唔知，又係小雲請~真係gentlement~haha，應該都要over 600元一仔~(因為我見到佢數銀紙)

食飽之後，大家就返酒店lu~

8月26日 (星期一)

為左飲個好好味西柚汁，Emmy朝朝都好努力早起身同我食早餐~

早餐真係ok正~!!仲有個炸竽波，勁好味，我可以一次過食十粒~!!

食飽之後，就出發去小山介紹既地方 - 八大關~

個度有德式建築物 - 花石樓 & 公主樓，睇旅遊書就真係幾靚~!!

坐的士去到花石樓，靚 & 好有歷史價值，不過行一行，15分鐘攪掂~

之後我地行左去公主樓，竟然.....唔入得囉~係門口望左一眼就走~

八大關係好出名影結婚相既地方，d新人多到呢.......不過大陸人既婚紗禮服，真係娘到爆~

我未見過有婚紗可以一頸都係毛毛波~hahahahahaha~!!果然大開眼界~

之後我地開左"大眾點評"app，search到附近有間cafe，於是我地跳上的士，想開開心心嘆返杯咖啡啦~

最後.......竟然搵唔到~!!不過司機好好人，不停落車幫我地問路，左兜右兜，最後搵到另一間cafe~

我地兩個都決定是但啦......估唔到亂咁搵，又有驚喜wor~

cafe - 朗園，環境裝修都好ok，又係ipad睇menu，咖啡同食物都ok~仲要望住海灘，真係好正~~~

後尾有幾個大陸男人游完水入左黎，我心諗﹕佢地一定係度勁食煙 & 勁嘈啦~點知.....佢地好自律咁行出門口食煙~

我真係估唔到係中國可以見到呢d情景，咁自律既中國人點解唔多d自由行黎香港呀﹖

我地好開心咁hea左好耐.......之後就坐的士返酒店~又遇到好好人的士司機，佢明明趕住交更都做埋我地生意，佢話5-7pm係青島的士交更時間，唔會有車ga~實在太好彩啦~!!

返左酒店，例牌繼續hea~!!

聽日小雲同小山先行回hk，本來佢兩個要同青島d part time同事食最後晚餐，但小雲話唔想又去海底撈火鍋~

於是小雲就join左我同Emmy食魚水餃，味道麻麻.......今餐我埋單啦，haha~

食完之後，小雲叫我地去ktv，佢話佢地同幾個part time去唱，叫埋我地一齊~

我就麻麻地想去，不過見佢地係咁問，我唔去Emmy又好似無得去咁.....所以踢拖同左佢地去ktv~坐的士都要30分鐘車程~

青島ktv，音響好得wor~得過香港Neway~$92人仔一個鐘，唔理你房有幾多人......

最攪笑係我地想叫野飲，waiter話﹕ 你要飲野要出去買ga~

原來係ktv入面有間超市，自己出去買野飲，之後就會有人拎比你~有個啤酒妹仲企係超市入面tim~hahahaha~

玩到零晨3點幾先走人.....佢個d part time真係好funny，話半夜學校宿舍鎖左門，返唔到去~

最後兩個女仔跟左小雲同小山返酒店~我覺得好危險囉，我叫小雲不如出錢租間房比佢地好過啦~(當時小雲係想我同Emmy收留個兩個女仔ga，但我死都唔肯)

好彩，最後都無事~不過大陸女仔既心思，我覺得要小心對付好~~~

而家智能手機太普及，人同人之間既溝通變得更簡單，我地可以用whatsapp、wechat、line去同朋友聯絡~

久而久之，說話上既溝通越黎越少~大家都係一句起兩句止，關心同問候更加少之又少~!!

我相信呢個都係科技發達所帶黎既後遺症~!!

講返我寫blog都要追溯返去2003年，話說個陣自己係poly d朋友仔開始玩blog - opendiary~!!

我地係blog上面寫既野，一d都唔表面ga，真係寫晒自己既心情、發生既事，同學朋友之間會透過blog去了解自己，每次見到我有唔開心，d朋友就會自自然然打黎問候，朋友之間慢慢建立起一份好深既感情，係blog既文字同whatsapp既文字，所表達既野，真係好唔同~!!

opendiary我都keep住寫到而家，但當然update既次數已經無咁密，可能係幾個月先update一次，而opendiary個blog已經由open轉左為private，因為已經無朋友再玩，我再寫都係比自己睇~!!

加上opendiary 而家成日死server，完全login唔到，所以今日係呢度又再開一個新既blog，希望同大家share下自己每日發生既事~!!

新手報到，大家多多指教~!!