小惡霸今日舊曆已經兩歲啦,尋日就收到Auntie 珮 & Auntie Stella送既第一份生日禮物Kitty單車,多謝晒兩位靚Auntie呀,姮姮收到架單車好開心呀,第一時間帶落公園玩,到我尋晚放工返去後佢已經踩到一兩下啦,睇黎佢好快就會學識自己係公園同其他小朋友賽車...呢個兩歲人仔學野好快,而家已經戒左片啦,係屋企又經常學我阿媽拎住條毛巾週圍抹;每次出街前都會自動自覺將玩具收拾好;做咩都淡淡定定咁好鬼老積;但亦有令人頭痛既問題,就係唔願意跟不相熟既人打招呼,仲要講"打你呀","米呀"(唔要)呢d說話去回應人,一有d咩唔順佢意時就發脾氣打人 & 搣人,我都唔知有咩辦法可以教番好佢呢個問題.今日收工後約左老公帶姮姮出太古城,我地先去Apita買左對布鞋仔比姮姮,即買即著不知幾開心,本來我仲想買條牛仔褲比佢,但佢點都唔肯試話條褲"吉吉",而家想買野比佢真係要佢鐘意肯著先好買,因我係食lunch時係香港仔買左對好靚既平底鞋仔比佢,但佢一試就話唔要點都唔肯著,真係激死我呀.買完野就諗住同佢去玩波波池,但點知裝修無開,姮姮同我地講左幾次波波池,唔想佢失望咁老公就打電話去check最近太古城既冒險樂園係邊,最後就唯有轉MTR去北角既和富中心,點知由MTR行去和富中心係好遠GA,所以去到時我&老公未陪姮姮玩都已經好累啦,玩到9點左右我地就join埋我細妹去apm買kfc返屋企食,因我已經無精力帶著姮姮係出面食飯啦,返到屋企食完野後就同姮姮切蛋糕,我地圍住唱生日歌比佢聽時不知幾開心,希望姮姮既壞習慣可以快d改好,做番個有禮貌既小朋友啦.