老公Happy Birthday

身體健康

32 weeks去健康院做產檢時姑娘比左張胎兒活動記錄表我填,mark番bb每日9am至7pm既胎動次數,如果當日未足十次就要入院檢查,我6月26號開始mark,胎動次數都正常,到7月2號果日就只得7次,我都有d擔心,唔知去唔去醫院做檢查好,到3號返到公司,成朝都唔知點咁,好唔安心,到12點幾我就決定都係去醫院check下好d,老公今日咁岩放假,所以就陪埋我去醫院啦,去到急証室d姑娘就叫我直接上2樓產房,起初我以為檢查完無咩野就可以走,但姑娘話一定要留院做檢查,當姑娘幫BB check心跳&胎動時,呢個百厭B半個鐘已經郁左十下,心跳果D亦都好理想,我真係比佢激死,但無奈又一定要係醫院住一晚,到4號等醫生檢查完,12點幾就返屋企啦.離預產期仲有個幾月,希望BB唔好再咁百厭,健健康康出世啦

話咁快BB係我肚裡已經有7個月+3日大啦,我覺得佢無姮姮果時郁得咁勁,但就百厭過家姐啦,因佢令到我成身都生左好多一粒粒紅色既野,攪到我好痕,有時夜晚仲痕到我瞓唔到,29號去健康院做產檢,姑娘話BB個頭好似轉左落下面啦,過多兩個幾月BB就出世啦,好期待呢,希望佢同姮姮一樣唔使我痛咁耐,健健康康咁出世啦.

今個月9號就32個月大既姮姮成日都會講"我大個女la ma" 我都覺得佢真係大左好多,有時佢既一d動作,一句說話都會令到我覺得好窩心,姮姮9月份就會讀K1啦,可惜既係佢入學時我仲坐緊月,未必可以陪佢返學,但可以的話我都會去陪佢,因我希望姮姮既每一個成長階段我都能陪伴係佢身邊;兩位寶貝健康快樂成長就係我同老公既心願啦

好幾個月無寫Blog啦,早前病左一輪,之後有段時間夜晚瞓唔到又無胃口食野攪到個人好累又無精神,點解會咁...因為我將再為人母,我和老公的第2個小寶貝將會在8月份出世,現在BB已有15週大,姮姮知道佢將要做家姐後就一直都話"打細佬細妹呀";前幾日我同老公帶佢出去食野,餐廳老闆同姮姮講"你咁似男仔,咁媽媽下個生細佬啦",姮姮反應好快咁答個老闆話"唔比媽媽生呀,打細佬ga";其實我都唔知姮姮明唔明咩係細佬妹,但我會比佢知道即使BB出世後我都會好似而家一樣咁愛佢.仲記得之前有姮姮時我每朝都會飲奶,亦會留意應該食D咩先對BB好,但呢胎我諗起奶都想嘔呀,亦無咩點戒口,第2胎真係無比第一胎時咁緊張,希望BB都會似家姐一樣身體健康肥肥白白啦.

已經28個月大既姮姮而家咩都識講啦,有時會比佢突如其來的一句說話笑餐死,亦有時會比佢既臭脾氣激死..當然最辛苦都係婆婆啦.

當大家入黎睇我Blog既同時不防開一開喇叭聽下我新upload既背景音樂"太陽伯伯"主唱:姮姮

11月真係超多人生日,每星期都至少有兩個我識既人生日,而與姮姮同一星期生日既就共有5個;今晚我地就為carrie,馬仔,柯金攪個生日BBQ,又係去番花卉食坊燒,我一家三口&我妹就跟馬仔車入去,馬仔女友仲買左兩包kitty糖比姮姮,雖然姮姮肯叫姐姐&講多謝,但就點都唔肯比fiona掂,反而肯比馬仔抱,未到7點我地就入到去,邊燒邊等齊人,加埋阿銘4個friends我地一行18人有講有笑十分開心,姮姮上星期先黎過,所以今次佢都好熟環境,carrie帶左包糖黎,姮姮見有糖食就肯比佢抱,但糖一到手就唔理人,佢真係一個好現實既小朋友.燒到10點半我地就跟番馬仔車返smp,姮姮一上車就叫馬仔哥哥,得得叫到落車,叫到馬仔到煩呀,哈哈...唔知阿得有無比姮姮叫到不停打噴嚏呢

因聽日又約左班friends去BBQ,所以姮姮既Playgroup改左今日返,星期六既堂返10點,所以老公可以同埋我地一齊上堂後先返工,姮姮今日都好合作肯叫老師早晨,返完playgroup後我就同姮姮返屋企瞓陣,到左4點左右就同我妹,豬皮帶埋姮姮過將軍澳接欣欣,因聽日係欣欣5歲生日,所以今日就帶佢出去玩,轉眼間欣欣已經5歲啦,佢BB時真係好得人鍾意,姮姮未出世時我就當佢係自己囡囡一樣,攪到我堂家姐都呷醋話欣欣痴我仲多過佢,唔知係咪因為咁所以姮姮而家都咁鍾意佢欣欣表姐呢;姮姮一見到欣欣就即刻拖住佢手,之後就同欣欣講"我地去波波池呀"係冒險樂園玩到7點零鍾就返SMP食飯啦,係屋企欣欣行去邊姮姮就跟到邊,真係好攪笑,到9點幾我就帶欣欣返屋企LU,姮姮當然好唔捨得啦;送完欣欣返屋企,我就join老公陪佢食飯,今晚我地去左寶盈果邊食,不過應該唔會再去第2次,因d野食唔係好得.

欣欣影呢張相時都未夠一歲,好得人鍾意ga

而家雖然無我經常幫佢裝扮,但都好靚女ga

係朋友既blog度睇到,有錢d話真係好想而家就同老公姮姮一齊去

http://www.hkflash.com/diary/read.asp?id=ffx&aid=17999999

今日我妹22歲生日啦.

祝你:

Happy Birthday

永遠都幸福快樂

姮姮愛你多d

平時唔多so 老師既姮姮今日竟然肯錫siu老師,哈哈...攪到siu老師都好噩然,走時亦都肯同老師講bye bye,希望姮姮下堂都會好似今次咁乖啦.上完堂後我地就過yoyo屋企,抱住姮姮係太子行去旺角搭車真係想死,好在有阿魚幫我拎下野.邊行姮姮就邊講"去搵郁郁B呀,郁郁B係屋企等緊姮姮"我覺得姮姮而家講野叻左好多,感覺佢真係大個左好多咁哈哈...差不多7點左右先上到YOYO屋企,郁郁B今日好開心呀,邊個有野食就去邊個度,無野比佢食就扮喊,真係好鬼馬.食完蛋糕玩多陣就走lu,同姮姮搭小巴返smp,落車時我叫佢同司機講"中心有落,唔該",哈哈..佢真係肯講,返到上樓仲講返比婆婆聽,呢個姮姮有時真係比佢笑死.