今日老公休息,點零鐘我地帶埋姮姮出太古剪頭髮,因今日我地無揸車,坐地鐵,所以就推埋架BB車出去,今次比姮姮坐直係BB車度,佢又坐得幾定WOR;唔知係咪星期日既關係,出到街真係有好多一家大細都推住架BB車,去到地鐵站等車時特然有個人係我後面好大聲咁喂左聲,仲拍我膊頭一吓,起初我以為撞到熟人啦,但轉身一望係個唔識既小男孩,8歲左右啦,同行仲有佢細妹同佢媽咪,佢好熱情咁問我,
男孩:BB好得意呀,佢幾大呀?
R: ..........5個零月呀
男孩:我地去拜山呀
R: 哦...係呀
男孩: 我地係油塘落車呀,你地係邊個站落呀?
R: 太古呀...
男孩媽咪: 你唔好行咁埋BB度啦,會嚇親佢ga
男孩細妹:BB係咪男仔黎ga ?
R:吓...係女仔黎ga
男孩: 你睇BB著粉紅色鞋,hello kitty襪ga,硬係女仔啦
男孩媽咪: 你地行開D啦,BB咁細個,唔好嚇親佢ar
男孩細妹:我今日無著好高果對鞋出黎呀
R: 吓....?
男孩媽咪: 佢係話高跟鞋呀
R: 哈哈...你咁細個唔使著高跟鞋啦,等大個D先啦
男孩: 我叫XXX,BB叫咩名呀
R: 姮姮呀
男孩媽咪: 你兩個唔好攪住BB啦
當然佢兩兄妹無聽佢地媽咪講啦,最後佢地係油塘落左車,哈哈..呢兩兄妹真係好攪笑,但姮姮對佢兩個既熱情係一D反應都無ga,同阿Sam一樣全程都目無表情.
2點幾去到bonnie度,今日佢好多客ar,但都忙裡偷閒同姮姮玩左陣,剪完頭髮4點左右我地就返將軍澳廣場行左陣,買左個hello kitty牙膠比姮姮,係KFC食左D野,之後去Modern Fitness攞埋張會員卡,其間好地地既姮姮無啦啦喊得好利害,逗極都唔係收聲,相信佢應該又肚仔痛啦,因佢今日又柯左兩次,最後我抱住佢逗左好耐先慢慢收聲,未行到返屋企佢就已經瞓左啦.到左夜晚8點零鐘,姮姮又再柯多次...本來已經停左唔使飲既藥水又要再飲番啦.
|
- Get Your Own
