今日番去上電腦，唔記得番果次去金鐘，記得呢次番北角。仲遠．．．

搭正六點準時閃，今日好彩地唔駛遊Lift河，小巴係６：０７開出，我都唔知係邊度落車好的情況下，落左一次蠢車，仲行左成條蠢路，呢條蠢人真係一日至少蠢兩次，一次都没有少。如是者．．．蠢蠢下．．．又蠢蠢下，結果遲左半個鐘。

上左三次堂，係同一地點出發，去唔同的地方，但每次都遲半個鐘。呢個事實係咪話比我聽，無論如何我都係遲半個鐘呢？遲到呢個過程令個人好緊張，趕呀趕呀趕呀，心理壓力好大(一睇佢講野要重覆三次就知啦..:p)，眼見人地揸住架電單車風弛電際，就不其然諗，如果自己揸去的話．．．咁．．．咪．．．唔．．．呀．．．　．．．應該係會迷路、甚至突然變身空中飛人架，都係唔好諗勒，算把啦．．。

自行放學後，突然發現對面果間野，咪就係蘇ｃ黃介紹話好好食既雞蛋仔檔囉，夜媽媽都仲有人排隊喎，係咪真係咁好味呢，我好自然咁本住食多Ｄ既精神，大無畏地親身買左黎食，哈哈哈．．．．真係外脆內軟架播，出面又真係搵唔到咁架播，就算食到最尾凍左，佢都係十八歲（卜卜脆）架播，不過咁，我個人較鍾意裡面軟林林的部份，呢部份有部份略嫌小左Ｄ，否則就PERFECT啦，食完個口好似損左添．．．都係太脆惹的禍。

呢兩日好似生左大食積咁，禽晚睇戲前食左個晚餐，睇戲後又要食多個餐．．．　．．．

今日咁番工開始個口就有不停咬，咬到好似食飯前一個鐘度啦，之後午餐食晒成碟飯，番去又繼續食餅．．．　．．．，我懷疑我睇完個痴線戲痴左線，除左食，我仲想不停講野．．．可能我太眼瞓，下意識唔可以有一刻停止，精神呈緊張狀而變得好精神，但又因為緊張而令人很累．．．　．．．我好想睡一睡，但我的宵夜還未番．．．　．．．。