今個聖誕睇左兩套戲，滿城盡帶黃金甲同埋傷城，兩套都無睇過佢講咩就去左睇，原來兩套都唔係咁岩聖誕睇，令人有點沉重。

先講講黃金甲，美術真係好好，好華麗，仲好浮誇，我唔明點解要一眾女士都奇峰凸出囉，好想問下導演，有人話張藝謀的英雄係垃圾片，但至少我覺得佢拍得好靚，呢套都係。

至於裡面既武功，我諗又真係唔可以稱得上係武功。

劇情就一般啦，後來再睇影評話情節抄雷雨，咁雷雨詳盡ｄ，黃金甲就欠缺左ｄ來龍去脈。

演員，鞏利真係一流，我一路睇一路諗有無其他更合適既演員可以做呢個角式，諗起劉曉慶，但都係覺得鞏利好ｄ，我鍾意佢果份倔強。發哥都好，不過著墨方面令佢變得失色，劉燁都做得好好，好記得你係咪想我死果段，係，我就係想你死。最唔明白點解搵杰倫，格格不入的樣子，奇奇怪怪的演釋，不忠不奸，不狠不毒，不柔不剛，簡單ｄ講，無性格，唔知想點，完全給比下去。

整體黎講，黃金甲係無期望既情況下都幾好睇。

但係傷城就．．．其實有悶位，攞無間道黎宣傳又真係有ｄ無得比。不過我鍾意梁朝偉，我鍾意金城武，都鍾意舒淇，但全場最好睇既係杜汶澤。呢套戲講每個人都有一個傷口，我反而覺得佢講緊人與人之間千絲萬縷的關係，正所謂剪不斷，理還亂，如果徐靜雷的爸爸唔係剎左梁朝偉全家，梁朝偉唔會係佢老公，如果金城武老婆無去到酒吧，佢唔會同舒淇一齊，如果車禍無發生．．．　．．．。其實現實生活有時都係咁，一ｄ以為唔關自己樹既事情發生左，原來係可以好影響到自己。如果果日我無見過你．．．　．．．。