最近我好容易就好忟，可能環境問題啦，好想搵個人傾下計，但都唔知傾咩好，我只係覺得個心鬱住鬱住咁，可能，我真係諗得太多，但其實，真係可以唔諗咩，船到橋頭真係自然直架咩，只係到時無得揀的時候，迫住將就。

同咪咪去睇專科，再去政府醫院，照完又照，睇report又睇，醫生話而家無野可以做到，再掃瞄啦，不過可能都照唔到ｄ咩，排期兩三個月（即係隻眼盲足兩三個月／如果係復發的話又拖多兩三個月），醫生話其實好快架勒，平時要等九個月，然後再睇番以前做手術個專科醫生，佢鬧住咁話你咁樣都係晒錢，諗住問佢咁情況係咪有機會復發，想去私家做唔駛等咁耐啦，佢話照晒你破產啦，咁你照唔照，果時我真係好興，但咪咪仲識笑，佢真係勁。

咪咪係我唔知情底下自行去睇醫生，跟住自行回家時仆親，比我知道後，每次佢出街我都擔心，盡量都會跟住出去，好彩我咁岩又辭左職可以自由咁跟出跟入，但我真係唔知屋企ｄ男性動物攪咩仍然好似好放心，有一日我聽到閂門聲，我即時開房門睇下，老豆就好安然咁坐係度睇馬，原來咪咪出左去買野，我即時問佢做咩唔跟埋一齊去，佢答我，係啦，佢自己要去，你去跟住佢啦。我真係比佢吹到啤啤聲！！

跟住佢地兩個出去食野，一個人番黎，我又問，你地唔係一齊食野架咩，佢話咪咪要食ｄ野佢都唔岩食，咪各有各食囉，我真係ｏ晒嘴。一個平時都輪輪盡盡，無啦啦都仆親的人，而家仲少左隻眼，咁都放心既？？一個咩都自己黎，一個咩都唔郁，同佢講你睇住咪咪啦，佢第二日就話病比我睇，好辛苦，個頭好唔舒暢，有病說不清果種心理病，大壓力嘛，望住隻牛真係無野好講，佢係一個無計劃的人辦，每樣都見步行步，有時連行步都懶，佢最叻的就係搵到咪咪，無論遇到咩事都一個人頂晒，每日都開開心心，就係想我做番個平常人，過番我本來的日子，每日都係賺一日，呢種平常心有時都好難得。

以前有人同我講，佢要死你唔比佢死咩，我覺得佢好無情，因為我係個會想極力阻止人死的人，我會覺得我有責任令佢唔好諗住死。不過而家心態改變了，真係有ｄ人點都要行條死路，盡過力就由得佢好了，每個人都有權選擇自己的路，我都無必要吃力不討好，應該平常心去面對。咪咪自己有事，對住三個煩人（當然包括我啦）都一樣咁平常，我都係對住兩個者，無理由唔得既。我要學識做人的最高境界　－　平常心！！！