好勒！又係review既時候，最近我真係覺得自己好不濟，就好似飄浮係個茫茫大海度一樣，何度是岸？我真係唔知道，只知道，我唔可以再浮係度，好似屎撈人咁！屎我係一篤屎，命比蟻便宜．．．　．．．。（我唔係講我呀！唱下歌舒緩下氣氛者．． )

我諗起，聖經裡面既一段，人物都唔係好記得，只記得門徒見耶穌係海上，就問耶穌，耶穌叫門徒落海走去佢度，門徒就落海，原本好勇咁可以係海上行，只見風浪甚大，就驚起上黎，於是沉落海．．．。唔識形容點解會諗起呢一段呀！可能我覺得自己飄緊，又可能我係小信既其中一個，又可能．．．。

我身邊有一ｄ基督徒，有一ｄ話自己信但我又唔覺佢信既基督徒，而我呢，到今日我都唔知話唔話自己係基督徒好！因為係我既角度，唔番教會既已經唔係基督徒，但係番教會既都未必係基督徒，因為信仰需要實踐，因為主耶穌的同在唔單單指番教會，而係生活中有神既同在，唔係佢會每日保佑你既意思，而係生活裡面會學效主耶穌既榜樣，好似好易，但又好似好難。每一個人都有自己既Norms，係成長既時候建立番黎，所以應該無兩個人係絕對一樣．．．我講左去邊呢！

其實我想講我想改變，無論任何一方面，我要重新開始，完左呢個學期我要建立早睡早起呢個習慣，所以呢！其實我禽晚同你講既野係真架！我知你會睇，所以都講下啦！多謝你陪我，更加多謝你話會娶我，就正如之前男朋友同我講既一段說話一樣，無人有必要去就我架！我知，所以我感激所有會就我、錫我既人，其實我有時都覺得你好慘，我都有ｄ唔好意思，你講真又好，假都好，已經好夠，我會去搵我既陳鍵鋒架勒！多謝你。

呀！點解會講呢ｄ野呢．．．我想講，以後我要活在當下，今天的事今天做，我都仲未做好ｄ功課！= ="，要好好處理當做既野，要面對現實，要對自己有信心，要聽人講，要保持健康，要多做運動，要早睡早起，要相對地勤力．．．要住咁多先啦！會唔會貪心左ｄ呢．．． 。

記低佢先．．呢個係五月廿九日講既！