今日去左電髮，係睇到傳單去，本來諗住最多三舊零攪掂抵抵抵既，但係去到見到就覺得有ｄ出事，因為超多人，而環觀週圍電完髮既人都．． 。

然後，小姐問我搵咩師傅，傳單上套餐價係junior整架，而果度既junior真係好jun咁既樣，唔敢搵個頭交飛之下搵左director，小姐話都係三百零度既，但係師傅話整好ｄ就整左個四百八，都係果句，唔敢搵個頭交飛之下．．就點左個頭。

師傅問：想點整？

我：唔知呀！總之唔要師奶唔要娘。哈哈！

師傳笑，然後又問：前面想點整？

我：唔知呀！你話事，總之要靚。哈哈！

師傅又笑，過一陣又問，後面想keep呢個長度定短ｄ？

我：唔知呀！其實我真係無所謂，靚就得架勒。哈哈哈！

於是戰戰兢兢咁整，未到最後一刻都唔知變左咩樣，越坐就有ｄ越驚，其他曲髮女士既曲髮都唔係我心水既，到底我呢個頭會變成點呢？ 整到成個頭都係圈圈個樣真係幾攪笑，果一刻其實幾想影底佢架！

好唔容易，新頭面世，director果然係有一手，呢個款係我其中一個覺得幾好既曲髮，勁yeach呀！不過唔比梳頭喎，仲要搽cream至夠令令．．嘩！支cream都＄166喎，妹仔就黎大過大婆呀！仲未計我要買過既相應新裝．．

P.S.第一時間的評語:

1.嘩!乜咁老呀！<---我都覺得好似老左...不過咁咪襯我年紀囉..呵呵!

2.幾好睇吖！<---呢個好明顯係世界仔既答案。

3.你唔好傻啦!以為好靚!<---係呢位人兄見到我既一剎那，我係呆坐中，都唔知佢係度，唔明點解佢以為我以為好靚！

***電完至記得未攞新身份証，呢個咁既頭影相真係．．． ，點算好呢!***