本來話今日放工番大陸按摩，等左好耐卒之約得成事。由於我唔知可以點去羅湖，只係諗到去慣既旺角轉車，於是約陳皮係旺角等，食ｄ野就上去。本來間野比我印象唔錯，不過今日之後就．．．　．．．

事緣黑仔肥呢排都黑黑地，係食野之際，亞waiter哥仔受唔住佢既黑色吸力，成個人連碗碟加咖哩汁飛撲埋去，真係呢，衫褲枱櫈都係咖哩，但係黑仔肥好鎮定，無郁，仲保持住佢一貫悠然既風格，好似無野發生咁，個waiter又好似無野咁，只係呆左一呆，十秒後至好無夸咁講左句唔好意思。

我睇到哥仔有唔好意思，但佢唔好意思既唔係整親人，而係整親人之後佢自己唔知點算，佢既無禮貌令我有點不滿，但我更加不滿既係個經理，佢只係黎望左兩眼，叫人比ｄ布抺番ｄ野，搵左個人幫黑仔肥抺衫咁，一句唔好意思都無。直到黑仔肥出番黎，我既心情已經到左想鬧人既階段，但佢竟然仲笑得落，既然當事人都無野，我又唔好意思緊張過佢啦。

後尾經理終於走過黎，佢竟然講：唔好意思，問我地要咩餐飲，我就忍唔住一連串係咁串佢（我完全覺得我仲忟過當事人），佢至識得狂講唔好意思，做番ｄ經理應該做既野。其實有時唔係我想鬧人，而係應該比佢地知道係佢地有問題，唔係我地唔係點出聲就當無事發生過咁掛，呢點係我極為不滿既原因，我諗如果佢淋到既係我，對住ｄ咁既態度，我一早拍左枱，禮貌ｄ真係道歉就話算啦，人地都無心既者。

之後求其去左買番ｄ衫褲，買完話開始起程既時間，我至突然諗起：我無帶回鄉証，都已經問你有咩要帶架啦，真係白痴！最後無啦啦行左陣街，無啦啦走左去整頭髮，呢排興左無啦啦做左第二樣野。