之前睇過一個節目叫BB保你大，講點樣教導一ｄ好唔聽話既小朋友，一開始影兩個小朋友，家姐就得果六歲，經常發脾氣，大聲鬧父母不特止，仲會亂咁掟野，而細佬就仲抵死，夜晚叫極佢瞓都唔瞓，成日開門出黎，父母就移動番佢入房，如是者三個鐘，好似玩咁！

之後，父母就請左個女人黎幫佢地改善呢個情況，個女人好直接咁指出好多問題，父母比佢講到好鬼不滿添。第二日，女人準備左一張大字報，寫晒咩時候做ｄ咩咁，父母以好懷疑的態度視之，我都以好懷疑既態度繼續睇落去．．．

當過度活躍症咁既細佬又搗亂既時候，女人叫佢唔好，同佢講道理，細佬依然係咁既時候，女人就罰佢坐樓梯，平時過度活躍既細佬竟然乖乖咁肯罰坐喎，睇到佢父母同我都呆左呆！

到家姐，家姐年紀大要罰困房，又ｏｋ架喎！如是者，一切順利照計劃完成了一日。

第二日就比父母自己黎跟住做．．．點知．．．

懲罰房間變左打機玩樂室，罰細佬坐樓梯既時候無解釋又無坐低同佢講，細佬就以為玩既唔肯坐，最後要爸爸出手打添！女人在遙遠監視時見情勢不妙就立即返去部屋，原來細佬要收到坐低望住佢講，同埋解釋罰佢既原因佢至會聽話，否則會當是遊戲，你叫佢坐，佢就企，好好玩咁，而爸爸忍唔住出手打佢後，會比到個信息佢，下次要打至會乖乖罰坐樓梯架喎！而用來懲罰家姐既房都唔可以係裡面玩耍，因為會令家姐產生錯誤信息．．．．．．

睇完我發現原來父母一直以為ｄ仔女天生難教唔係仔女既錯，而係方法既錯。

就好似我今日考試咁，係方法既錯。我知道點解我咁鬼失敗勒，但係唔識點解決喎！有無個女人可以幫幫我呢？