因為睇左電視，今日上左亞咩吉場睇下，其實都想留個隻字片語鼓勵下羊爸爸，羊媽媽同埋半哥哥，可惜牛言版暫停了！睇完之後都想整番個完全屬於自己既網頁，可以毫無保留地做一個自我小天地，幾好！

其實亞咩吉場唔係一個特別靚，網頁做得特別好既地方，但係睇過令我覺得，可以毫無保留咁係裡面暢所欲言好好，或者因為一份情一份真，呢個地方至有咁多人睇，亞咩一定係一個能夠讓人開心既女仔，雖然已經唔係度，但係睇到ｄ相，都感覺到果份開心！

從來都無諗過自己寫既野比屋企人睇，好奇怪，屋企人唔會係我share既對象，總係覺得好尷尬咁，由網頁去連結起一家人的感情？唔，我做唔到．．．唔知係細個習慣左定咩呢，我記得好細個既時候要爸爸抱，佢會推開我，好細個既時候，想同媽媽講野，佢會叫我行開，我細個既時候真係覺得屋企無人鍚我架，或者因為咁，大個左佢地就鍚多左我，我而家至可以做個霸王女，係屋企惡晒，哈哈！

只係，習慣溝通既時候已經過去，要我抱抱爸爸，鍚鍚媽媽嗎？得既，會起雞皮同埋好假囉！關心嗎？我相信呢個係遺傳，媽媽關心我既時候（即係去邊，做咩，同邊個等等），大既連我呢個小既會答關你乜事，而我關心佢既時候（即係唔知做乜又激親佢），佢會答你死開。溝通唔到大概係有得遺傳．．