好多人食漢堡飽，通常都係去麥當勞，我諗尤其是小朋友特別鍾意啩﹗但其實我唔知d小朋友鍾意麥記d乜囉？因為我個人覺得麥記d o野味道其實真係麻麻地﹗如果要我評分，佢只係剛剛及格個隻﹗我唔鍾意d飽醬汁偏酸囉﹗仲要夾舊勁酸o既青瓜，乜d青瓜唔係應該清甜爽o既咩﹗

講真，香港一直以來都曾經出現過其它快餐店，但係好似無間站得住腳，但其實我反而鍾意其它快餐店囉﹗d o野好味d呀﹗

好似以前有間叫wendy's，佢d漢堡飽好正o架﹗聞到個塊牛肉o既香味，真係殺死人﹗咁先叫漢堡飽呀嘛﹗可惜，最後都係摺埋o左﹗

而家仲有一間快餐店長的漢堡飽，係我好鍾意o架﹗但全港只淨得一間咁多，仲要係中環，佢就係Jollibee(祖樂比)，咪以為係中環就好high，間舖最多係菲律賓人，我教會一個姊妹告訴我(因為佢以前細個住過菲律賓)，依間祖樂比原來來自菲律賓，所以咁多菲律賓人囉﹗服務對像係同鄉，因為好多同鄉會去，當然我地都可以去o架啦﹗

我好鍾意佢o個個漢堡飽，因為塊牛肉好香﹗我覺得好的漢堡飽，凍o左都會好食o既，仲要係個陣香味仲係度﹗可惜，我其實好少去中環，好在，我做按摩就係對面，所以每次去做按摩，如果夠時間，我都會走去買漢堡飽，只少2個，或者3個，當然唔係一次過食哂﹗要慢慢去享受，每次食，都會食得好開心﹗因為真係覺得係世間美食﹗非常之好味呀﹗

大家如果有興趣可以去試吓﹗不過漢堡飽係無係佢o個個牆度d牌，係自己叫，不過如果真係叫漢堡飽，記得係叫牛肉漢堡-Beef Burger(HK$6.50)，或者另一款叫祖樂堡o既飽都同樣好好味o架﹗仲有佢d炸雞都好好味，好多汁，但就要即時食比較好，仲有一款叫芒果蜜桃批，勁正﹗比麥記o既蘋果批正多多聲，麥記d蘋果批，千祈咪預我﹗