無打blog好耐啦!
今日唔知咩事,突然好想打番,於是就決定重打。我都唔知今次我既"恆心"可以維持幾耐....
唔理啦!講番對上一次打完blog之後既事啦
今年太多事發生左係我身上啦!我喺5月時開始要食一種新藥--類固醇,又名"肥仔藥"。一食左種藥之後,我塊臉開始腫脹,仲有埋個肚腩...唔只呀,過多兩個月,藥既副作用仲另我有埋"糖尿病",你話係唔係吹脹!依家我日日都要自己打針,一日四次,無間斷。停既方法就係停藥,但醫生又話唔停得.......我依家唯有見步行步啦
關於感情方面,我依家可以講係完全無寄託,自從"佢"從我既記憶中消除之後,就再無其他人出現啦!"佢"既離去對我有無打擊,有無傷心過,咁當然係有啦,但係我傷心既時間唔係太長,因為我認為唔值得呀,都無開始過,只係自己一相情願,如同某人所講一樣,再落去唔會有結果,俾我既,卻只係「犯賤」兩個字,又何苦呢?依家眼見好多身邊既朋友一個一個咁開始拍拖,個口就話唔在意,無咩所謂,但其實心中唔多唔少都有d羨慕。哈!羨慕又有咩用呀,我依家腫左,我自己都覺得自己「樣衰」啦,更何況其他人。我只好自我安慰:命裡有時終須有,命裡無時莫強求。
在近排發掘左一頂新嗜好--保齡球,我同小涁,馬屎已經一同學波去。都好嘅,當係俾自己喺課餘時既唯一寄託啦!
朋友方面,我同馬屎,小涁同張康就愈黎愈熟,但係自從啊豬入左d班之後,我地已經無咩聯絡啦!而我同何生雖然係一同入左a班,但唔知點解我地之間突然有左一重隔閡,我漸漸覺得往日之情不再。我自己就係班中愈來愈覺得寂寞同冷清,我究竟係咪真係自我中心呢?
講番近幾日既事,
經過左兩星期既考試,終於可以稍為脫離"瘋狂咪書"狀態。唉!但係回望自己,今年已經f.5啦,究竟係咪真正可以有時間俾我放鬆呀?
現在既我經常要以過來人既身份去訓誡我一大班既堂兄弟姐妹,要佢地努力讀書,唔好荒廢左中一至中三既日子。我係一個好失敗既例子,因為我當年就係"hea"左嗰三年,搞到中四要勁苦地狂追,尢其係數學......
唔知係我好彩定咩,我係中四當年預到個十分好既啊sir--mr.kk程,佢真係幫左我好多,我個分可以由上學期既3字頭升到下學期既6字頭,我直程覺得對佢講一千句一萬句感激都唔夠。若果真係要講,只可以用"無言感激"黎形容。同時我上年既學期成績都升左,由上學期既一百一十幾,升到下學期既八十幾,話多唔係多,但我對自己既表現已經可以算係滿意啦!
講番今次考試既成績,雖然未派灑,但已經見到係有好有唔好。中文派左四份,geog都派灑,大致上都滿意,hist更可以用唔錯兩個字黎形容。但係econ就.......唉!應該唔洗摘星既!!其他就未派灑,唔講住啦!我真係要好好惡補番d書,尢其係喺我病左嗰兩個禮拜既書。我唔可以再用病黎做借口,因為我知道這個借口唔會俾考試局接受而唔洗考某d部份既課文家嗎,係咪?
我終於係今次既考試中學會左一個我應該明左好耐,但係又發覺今日先明既道理:一分耕耘,一分收穫。hist同econ就係兩個好極端既例子。依家我終於開始有一個中五學生應該有既危機感,可惜仲係唔係好強,咁係咪已經太遲呢?
今年直到今日既情況大致已經講完啦,都係時候完結啦!
|
