琴日星期六，理應訓到日上三竿先起身，點知七點幾醒左後唔係好訓得著，
後尾起身上左陣網，九點幾出去銀行，因為月頭又係交租日，
跟住去左先前發現街市附近的一間港式茶餐廳，呢間餐廳叫『翠華』，
唔知係咪香港果間分店呢，不過呢間真係非常港式，學埋香港咁２４小時營業，
除左有唔炒小炒、港式燒臘、粥粉麵飯、奶茶咖啡、腸粉粉果糯米雞等外，
仲有少許甜品仲有類似街頭小食如咖喱魚蛋、尤魚等，款式分分鐘多過香港ｄ茶餐廳，
真係擺明做香港人生意，唔怪得間鋪裏面ｄ男人大多數都係香港人，（女人多數係內地老婆／女朋友／二奶），
果區真係住左唔少香港人，可惜唔太近我住呢邊，若果唔係又多個選擇。
食完之後順便去街市睇下諗住買埋野返去晏ｄ唔駛出黎，
其實今日心思思又想試左燒腩肉，上次失敗左好再試，諗住睇下有冇五花腩買，
果檔見平時比較多人幫襯，我諗應該好ｄ，不過肉檔老闆話五花腩賣晒，
叫我十二點半後再黎過，於是去附近超市行左陣再返去，果陣見肉檔ｏ既人正解剖緊隻豬，
於是等佢切左舊腩立即買，不過始終都係經驗少，明明一大舊腩比我揀先，
我都唔識揀舊最靚ｏ既，到人地切左比我先望真另外果邊靚ｄ，
不過算啦，已經專登叫人幫我切到正方形，費事攪到人地ｄ肉奇奇怪怪難賣，
今次反正又再試驗，又當拎多次經驗。
因為今日早買餸，所以夠時間醃制，今次冇加到雞粉，味道好過上次，
唯一係果皮仲未到到爆皮同好脆ｏ既效果，下次我會試下先用焗，然後爆皮部份用『烤』，
雖然今次仍未成功，但舊燒肉味道已經唔錯，係差果皮未做得好，
上次怪獸先生話得五十分，今次都有八十分，都進步唔少媧，佢仲話味道好過出面買果ｄ，
好啦，等我下次一於再接再勵，要做到一百分為止∼∼哈哈！！
| 
