放假o既日子實在太好，雖然冇做乜野，但心情都好ｏ既。

琴日細佬過黎一齊飲茶，之後同佢一齊去對輕便涼鞋，我同佢一人一對，
怪獸先生上次買左對覺得幾好，只係八十大元人民幣，若ｏ係香港果ｄ雞雞地都要百幾蚊，
雖然依家唔係著涼鞋ｏ既天氣，見ｏ岩買定冇壞，夜晚一齊食完飯細佬先走，
今次佢冇留ｏ係度過夜，因為要返屋企看住對『活寶』(我老爸同老媽）。

今日怪獸先生放完佢叫做一個ｏ既聖誕假期要返工，我就依然可以訓晏少少，
不過今日都唔收太晏起身，所謂唔晏都接近十一點，然後起身梳洗後去嘆個早餐，
跟住坐車去左羅湖商業城，襯朝早可以自己出去行下同埋襯假期尾聲，
睇下有冇ｏ岩心水ｏ既鞋買，結果一口氣用左百二蚊買左三對斯文返工鞋，
而且三對鞋都比較ｏ岩冬又著，因為一對鞋面有毛毛球，同埋學下豹紋同事買對豹紋鞋，
另一對成對都有薄薄毛毛，鞋頭有個蝴蝶加兩粒閃石似一對『眼仔』，
鞋尾則有一個小小的毛毛球似條尾，我覺得幾可愛所以買黎扮下可愛，
反正某住唔鍾意ｏ既同事年紀一大把都扮天真可愛，我都要唔好執輸扮下先得，
希望唔會嚇破膽啦∼∼哈哈!!!

不過個羅湖城今日都好靜，唔知係咪因為今日都唔少人要返工還是ｄ人留港消費，
人流真係少，而且今日行去布城度望過，以前幫襯做衫間鋪冇左喇，
咁都正常ｏ既，自從人民幣升值，返去做衫都冇乜著數，有時ｏ係香港買仲平，
ｄ人生意難做，唔做都好正常，好在依家ｏ既元朗都有間幾多ｏ岩我size O既鋪頭，
若果唔係買衫又好頭痛喇。

放埋聽日又要返工喇，點解假期都總好似過得咁快，真係放極都唔夠喉呢∼∼

今個星期開始班agent 唔駛打咭返工開始放假，所以朝早九點都係得幾丁秘書ｏ係度，
實在好靜，但亦係咁ｄ holiday mood 立即湧晒出黎，好在人少少可以傾下講下，
若果唔係ｄ時間仲難過。

今年難得可以放廿四號，一直以來家姐老闆功不可抺幫我爭取返黎，
但今次聽家姐老闆講，居然係煩煩老闆提出若廿四號同三十一號都放半晝，
不如比我選擇一日放假一日返全日，大家都諗唔到今次佢咁大方，
不過我諗煩煩老闆一定好後悔，因為我頂心頂肺唔幫佢打去hotline問單case，
但因為我真係覺得太唔合理，連我自己都過唔到，又點揾point 去幫佢爭取，
或者真係我份人太主觀，唔似果ｄ擦鞋精為爭取表現真係lur 都lur到返黎，
可能呢樣都係我缺點黎，但算把啦，總之我唔想太勉強囉。

琴日難得有日假期，原本以為可以同怪獸先生一齊嘆下聖誕假，
因為佢今個星期一已經開始放假喇，點知人算不如天算，佢早兩日臨時被徵召幫手，
廿四同廿五號都要出動，不過都唔緊要啦，我自己都可以抖下，
所以琴日同佢一齊飲完茶之後一齊出元朗，佢去返工我就遊走元朗，
平日返工都係急忙咁經過，今次又可以好自由咁一支弓鍾意點行就點行。

話時話做左呢份工後，年年聖誕前都好忙，唔係忙寄聖誕咭就幫老闆追數，
一到放假都想休息唔願出街，當忙完後聖誕都到喇，年年都冇乜去買下野過聖誕，
今次難得有一假期，行街見到多人買禮物好熱鬧，先好似感受返下好耐冇感受的氣氛。

今次一行都有收穫，我自己買左兩件衫，唔貴又ｏ岩身，
近日發現一間小鋪頭真係好，ｄ衫又大件又唔貴，難得ｏ係呢間鋪頭買ｏ既衫，
有時細碼都ｏ岩我著，真係好以幾廿年都冇試過喇∼∼哈哈！
另外又幫怪獸先生買左兩條褲加一件衫，買兩個人ｏ既野加埋都係三佰幾，
覺得真係幾抵。

琴晚同前晚連續打左兩晚邊爐，今日都係煮下飯仔，聽日細佬又會過黎行下，
呢個假期要好好咁relax 下先得喇∼∼

今年老闆們都放棄追數，所以都冇以往咁忙，寄完聖誕信後，
呢個星期開始都係忙ｄ scanning，因為來年家姐老闆要出房，
ｄ file 冇地方放，一定要scan 晒佢，所以揾左走左一段時間ｏ既囡囡幫忙，
而煩煩老闆就揾黎佢真正ｏ既囡囡返黎幫手scan，所以下個月雖然過左追數時間，
不過都要忙於執 file。

琴日分行開聖誕趴地，我地幾個秘書一向唔鍾意參加呢類應酬，
分行女經理都知道，所以ｏ係佢臨放產假前比定錢分行秘書，
話請我地三個（女王、分行秘書）仲有細佬老闆ｏ既RM同事飯飯當慶祝聖誕，
我地之前商量左等佢地開趴地的一日去食，咁ｏ岩家姐老闆今日都有返黎，
佢又係唔鍾意去應酬果種人，所以就拉埋呢位唔去聖誕趴地的小朋友一齊去，
於是一行五人一齊去食餐聖誕晏仔。

下個星期又到聖誕，家姐老闆又話係時侯傾下有冇得比我放早ｏ既問題，
因為今年冬至ｏ係星期日冇咩影響，農曆年三十又係星期日，所以都唔會返工，
係黎緊ｏ既平安夜同埋除夕要返工，一向家姐老闆同埋心急老闆都冇咩所謂，
係煩煩老闆次次都懶係執得正驚死蝕底比我咁，所以家姐老闆要同佢傾，
臨放工前佢同煩煩老闆傾左，不過未揾到心急老闆，因應該都冇咩問題，
佢地諗住兩日都比我放半日，都唔會理其他秘書架喇，另外就仲有個方案，
就係我將兩個半日夾埋成一日，即係變左一日唔駛返，一日就照返全日，
若比我揀我當然寧願揀第二個方案啦，反正都出開黎返工，返多半日冇問題，
但係有一個可以唔返媧，可以揾晏ｄ都得，加上下星期話會凍返，幾大都留ｏ係張床度好過，
不過最終都要心急老闆都冇問題先得，但諗到呢ｄ已經冇心機返工，
ｄ holiday mood 都出晒黎喇，自八月去完北京後難得有幾日的假期呢∼
好期待啊！！\(^o^)/