呢兩日女王放假，朝早冇人經過個位隔離講早晨，好似有ｄ唔慣咁。
今朝稍稍有ｄｄ忙，因為三個老闆都有返，但至麻煩都係煩煩老闆，
話說上星期五臨放工時佢地訂左送比客ｏ既禮品到左部份，其中有大ｏ既幅字月曆，
煩煩老闆訂左五十個剛好一箱，因為佢個位冇乜地方放兼費事拆左箱驚比人偷，
所以唯有成箱放ｏ係煩煩老闆張椅後面，其實都係唯一放到箱野ｏ既地方，
我都知好迫，但實在冇法子唯有放住先。
今日煩煩老闆開完會行過黎揾我，同我講箱野放ｏ係果個位唔OK，
其實我都知好迫諗住放住先，睇下佢想點處野，不過佢果句『放ｏ係呢度唔ｏｋ！』
我聽起黎好唔順耳，我夠知唔ｏｋ啦，咁佢想放ｏ係邊先得架？
可能聽左佢句野我係有少少興興地，答返佢『咁放ｏ係邊先ｏｋ？』，
然後行去佢個位度，佢仲要話『總之唔ｏｋ』，於是我又話『咁邊度先ｏｋ？』
佢自己都諗唔到放ｏ係邊，仲問我枱底放唔放到，我好想同佢講，我平時ｏ係佢度file野，
好似要娟狗”燶”度，我仲唔細份添，幾驚有日塞左入去都爬唔返出黎，
跟住佢話放ｏ係椅後書架頂，我立即話肯定會跌落黎，心諗到時跌落佢個頭就唔好賴我，
最後佢話放ｏ係佢個椅隔離一個三層櫃上面，其實只係勉強ｏｋ，我話怕跌落黎整親佢，
佢猛話唔怕，咁佢都唔怕都話之佢啦，然後又叫人依家整，因為覺得好阻住佢，
真係煩到爆。
冇耐家姐老闆揾我做野，跟住煩煩老闆又黎揾我，話想我幫手，
佢拎住一本好厚ｏ既硬皮書，係一ｄ教插花ｏ既書，裏面有ｄ教插花ｏ既線條，
佢叫我幫佢scan 左佢，仲要係今日整，真係一見到個心極之不快，
本書又大，我諗都有排scan，於是同分行秘書訴兩句苦，好在分行秘書一言驚醒，
提我不如用部新影印機試下scan o既function，於是晏晝人少ｄ時去試下，
結果scan 左三十頁彩色都唔駛十五分鐘，因為今日第一次試，若果熟手ｄ可以更快，
出黎效果又靚，攪到依家好想去scan 野黎玩添呀，一於聽日再拎ｄ文件去scan 黎試下先。 | 
