琴日經歷左無啦啦o既半日假，ｄ時間好似亂晒咁，
今朝仲擺左個大烏龍。

話說今朝聽到鬧鐘響，起身梳洗後如常咁開著電視呆坐一陣，
諗住睇下天氣報告同新聞，仲想睇下有冇咩色ｏ既暴雨警告，
點知望到報新聞個時間係八點零幾分，心諗自己有冇睇錯，
跟住再望下廳ｏ既鐘，好似係八點，於是個心又諗．．．
唔通聽日打風時屋企停過電ｄ鐘唔ｏ岩？再跟住入房望下鬧鐘，
Oh NO!!原來較錯鐘，本來我應該較六點四十分，點知較左七點四十分，
今次真係大烏龍，起初仲完全唔發覺添，肯定遲大到，
不過算啦，我地呢ｄ年中都冇幾可遲到ｏ既人，我諗遲一次老闆都唔會怪罪ｏ既，
所以都如常咁返工冇特別趕，過完關再上車先打比老闆自首，
佢都冇怪到我，不過亦因為自己遲到，亦避過左返工時ｏ既傾盆大雨，
聽女王講都濕左半身，叫做遲到都執返身彩。

返到公司都成十點，只有家姐老闆ｏ係度，佢話其他兩個都未返，
之後男老闆先返。今日真係幾多野做，尤其晏晝差不多時間幾個人一齊揾我，
依排男老闆同前細佬老闆有野整，月頭要半個月要寄二佰封信，
仲諗住今日抽空打緊ｄ地址，點知都係打得幾個，下個月二號要寄第一批５０封，
仲有兩個工作日做咋，之後仲每隔兩日又寄幾十封，真係諗起就有ｄ閔憎，
佢地硬係ｄ野要預到咁緊，有時唔係下下都抽到時間出黎做家嘛，真係丫∼
聽日家姐老闆諗住唔返，所以今日鬼咁勤力做野然後過晒比我，
希望聽日佢唔返工之餘比到時間我做下野啦，唔係黎緊實趕死左喇∼∼

琴晚天文台預告會掛八號風球，不過自已預計返工前應該會落波，
所以冇諗過今朝起身仲係八號，但天文台話可能朝早會掛返三號，
不過點都好，立即爬返上床再訓。

因為要隨時留意風暴消息，所以都唔可以訓得好『淋』，兩個鐘左右又醒一醒，
結果十一點幾掛返三號，其實都估到架喇，天文台又唔敢掛足成日，
因為又怕比人插。

因為我路途遞遠，又怕路上會塞車，所以唯有選擇坐火車，
十二點零出門口，坐完地鐵過關再坐火車，結果足足成兩粒鐘，
返到公司都成兩點幾又未食野，所以返去打左咭都唔埋落樓下食ｄ野，
我都有打返比家姐老闆講低，我估今日ｄ老闆都唔返，
唯一係男老闆ｏ係我返工途中打過比我，因為佢要交單同埋出proposal兼去上堂，
結果食埋野正式返上公司開工都三點。分行秘書同女王佢地都估我係咪唔返工，
其實我不知幾想，真係有咁ｏ既衝動，返去果三粒鐘真係有ｄ無無謂謂，
我諗就今次都要再同家姐老闆定下我若遇上八號或黑雨落波幾點後唔駛返工，
我心目中最好係十二點啦，若十二點後落都仲要返，咁我真係返一返去又走喇，
真係揾黎攪。

因為今日工作時間唔同晒，攪到自己好似唔知想做乜咁又放工。
不過放工前RM同事同我講開始要幫男老闆同前細佬老闆果壇野，
總共要寄成三佰封信，但要用手寫信封唔好用printer print，聽到都想死咁濟，
加埋要幫家姐老闆寄幾百封newsletter，睇黎我又要做做足一個月『寄信婆』喇∼ >.<

因為星期日朝訓得多得濟攪到星期日晚訓唔著，
連鎖反應係星期一極度唔夠訓，所以琴晚十點零已經捱唔住爬左上床。

今日公司都有少少野做，因為三個老闆都分行出單，
男老闆仲簽左兩張單添，係上次幫佢手打個對比ｏ既excel file，
好在簽到單，都不枉幫佢打份野。

今朝睇天氣都知打風，起初預計未必會掛三號風，不過臨放工前已經掛左三號喇，
依家外面風越來越大，聽話十一點前應該掛八號添，
呢個『風神』個名都好有氣勢，之前橫掃菲律賓，依家好似來勢洶洶咁，
但即使掛八號，都唔知捱唔捱到掛咁耐，至怕聽朝掛掛下落波返工仲混亂，
所以最好一係唔好黎，一係就掛耐ｄ，咁就好喇∼∼ (懶虫心法．．．）