<<第一次整ｏ既粟米魚肚羹，都應該合格卦？！＞＞

＊　＊　＊　＊　＊

星期六喇，不過今日依然陰天兼落雨，原先諗住食完晏仔去羅湖行下，
不過落住雨都係費事出去，寧願返屋企下陣網同打下機，
但係就襯有精神去街市買下野，因為今日想整個粟米魚肚羹，
呢個羹我好鍾意飲，不過未整過，以前以為ｄ魚肚會好貴添，
早兩日去流浮山買左袋返黎先知唔貴，實在太好喇，可以自己試下整，
呢個羹好簡單，雖然第一次整都叫成功喇，實在太開心喇，
第日得閒可以多ｄ整黎飲∼∼

黎黎黎......預左大家ｏ既，入黎記得”不”多碗呀∼∼ ^++++^

呢幾日天氣極唔穩定，朝早成日都落大雨，
琴日出街見好多白蟻周圍飛都知應該有雨，好在呢幾日放假，
免左返工大雨攪到落湯雞咁慘。

今日訓醒又去左飲茶，享受埋今次假期中最後一日閒日假期，
放埋聽日後日例期又要返工咯，到時新一個月份加新一個老闆，
又係一個新開始，唔知係好定唔好呢？不過點都向好一方面睇會開心ｄ。

飲完茶ｏ係附近四周行下，又去行左個平時假日唔會去行ｏ既地鐵商場，
因為假日人太多，今次都係第一次去，算多野賣，應該都幾ｏ岩年青人口味，
行完商場又行超市，行到成五點先返屋企，跟住都唔多想郁喇。

黎緊淨低兩日假都要好好享受埋佢先得∼∼ !!

<<用手機拍的深圳灣大橋的全景相＞＞

＜＜一個傻婆走在蠔殼堆成的小山丘上＞＞

＊　＊　＊　＊　＊

第三日假期喇，都係時候出去行下，朝早好似都落雨卦？？
不過我起身時（十二點）都已經冇雨喇，梳洗完後起程返去元朗，
依家住左黎呢邊，覺得放假過返香港好似內地遊客自由行咁，哈哈∼
過到元朗接近兩點揾地方醫肚，兩點後有下午茶時間食野抵好多，
有時諗諗下係咪都應該同老闆講食飯時間轉兩點，每日慳少少都可以慳好多，
依家物價咁貴又冇人工加媧，要諗下方法慳錢嘛。

食完野開始周圍行下，想睇下衫又睇下鞋，不過都話左有隻怪獸跟住一定買唔到野，
因為佢又唔肯跟埋入鋪頭企ｏ係門口等，咁我通常又費事睇咁耐怕出去有人變左化石，
都係鍾意自己一個人行街，反正依家咁大個人都會知道自己鍾意乜，
唔係下下問人意見，所以要買左都係留返自己慢慢行好過。
不過我都買左件打底小背心，難得ｏ岩我size ，本來諗住去惠ｘ超級市場，
因為有張coupon 諗住有人幫手拎野先去入貨，途中經過去流浮山小巴站，
諗起真係好耐好耐冇去過喇，有時擇日不如撞日，襯平日人少少去行下都好。

我地入去時都唔早，都接近六點，好在依家天黑得晏左，但今日天氣麻麻，
晏晝都有太陽，不過唔落雨都叫執到，我地穿過食海鮮ｏ既地方去到海邊，
記得上次黎ｏ既時侯先開始起『深圳灣大橋』，依家都通左車接近一年喇，
所以話幾耐冇黎呢∼係海邊行左陣影下相，好似好耐冇聽過海浪聲喇，
真係幾舒服，留左大半個鐘就走喇，經過返ｄ海鮮小攤檔買左包魚肚，
見廿幾蚊唔算貴又幾大包，所以買左包，返去可以試整粟米魚肚羹喇，呵呵∼∼