自從知道心急老闆要離開，呢個星期都有同家姐老闆傾下大家意向，
只不過係ｄ老闆未有時間大家定定咁坐低傾下，而心急老闆都好快快ｄ知道其他老闆決定，
都明白ｏ既，因為佢都唔想因為佢ｏ既離開而麻煩影響到我地三個，
而琴日臨放工時又同心急老闆傾左陣，透露對佢提議ｏ既方案對日後似乎會牽涉唔少問題，
心急老闆聽到都話明白ｏ既，可能好多野冇細心去分析，睇黎佢應該明白冇咩唔開心，
所以今朝早我就將呢樣野話左比家姐老闆聽。
接近中午聽到家姐老闆約煩煩老闆同埋侯選未來老闆（前細佬老闆downline)飲茶，
似乎佢地應該會坐低有密偈傾，所以呢位都好大機會係我未老新老闆，
食完晏返黎見家姐老闆同心急老闆又閉門傾左陣，就召喚我一齊入埋房傾偈，
佢地講返個結果比我聽。
家姐老闆話已經打過比心急老闆傾左，話大家覺得佢提議ｏ既方案唔係咁好，
而佢地可以揾到人加入代替佢離開後位置，而心急老闆都明白同接受，
所以兩個老闆同新加入老闆都傾好左喇，會由下個月開始新組合，到時我又多返一個男老闆，
我諗呢位男老闆人都唔錯好客氣，但做事作風應該同家姐老闆幾似，
所以預計以後會比依家忙架喇，呢種比較悠閒ｏ既生活就咁過去。
另外為左ｏ係心急老闆離開前清晒ｄ假，唔好帶去新年度影響新老闆，
所以今個月要清晒剩低ｏ既四日假，本來我諗住幫心急老闆善後完先放，
但家姐老闆話越接近月尾，心急老闆越需要我幫忙，所以提議不如下星期放，
咁連埋星期一ｏ既佛誕假期連埋前後ｏ既星期六、日，足足放九日假，
諗落真係好爽，不過只係工作上先甜後苦ｏ既甜頭，之後返去實定忙足兩星期，
因為除左要幫心急老闆清晒房裏面ｏ既野，仲要幫佢寄幾百封信通知客人佢離開ｏ既消息，
仲有今日先發現原來睇漏眼仲一個box 未scan，完全覺得兩星期係唔夠時間做，
真係救命呀，冇計啦，唯有好好咁享受左ｄ假期先再返去捱過啦∼∼ | 
