琴日幫心急老闆執野執左成日，好多文件要處理都未整，
所以留返晒今日處理，不過三個老闆都有ｄ文件上ｏ既野要做，
好在唔係話好難做，做左接近一個朝早就攪掂。
自從有ｄ同事搬左上樓上，依家暫時有ｄ房空左出黎，
我地幾個秘書懶出去食飯，所以呢排多收叫外賣返黎，貪唔駛出去等位，
今日因為女王要出去買郵票，我同分行秘書要去買紙杯，所以一齊出去食，
唔知係咪一輪冇出去食飯，去開ｏ既地方左右隔離都開左ｄ新食店，
不過亦發現近來真係物價飛漲，真係度度都加晒價，今日本來想去間鋪頭仲一加加三蚊添，
條氣有少少唔順所以去幫襯第二間，依家香港人又要捱貴野喇，
最慘係乜都加，係人工唔加，慘∼∼∼
返到公司冇耐同幾個秘書一齊上去幫老闆拎去機票同去旅行ｏ既野，
因為月中心急老闆同家姐老闆都去公司個旅遊獎賞，目的地係『杜拜』，
本來家姐老闆仲會同分行秘書老闆一齊ｏ係停曼谷時留多三日，
點知人算不如天算，分行秘書老闆早幾日做左個手術，雖然唔係大手術，
但醫生唔建議佢去旅行，於是依家攪到家姐老闆好煩惱，變左要一個人留曼谷，
攪到佢都有ｄ唔想去，但錢又比左好似好唔抵，但公司又唔比賣位比人，
依家唯有睇下細佬老闆個RM同事買唔買到去曼谷機票陪家姐老闆玩幾日啦。
琴朝D agent 去上堂，知道有ｄ新基金同推廣，有關單張今日會拜落公司，
跟據一向經驗，通常有新野出ｄ單張等會好快冇晒，我初入黎做時冇人提我，
所以有呢個經歷，攪到老闆想要時我都唔知去邊度揾比佢地，有左呢ｄ教訓，
之後我都要好醒目地有呢ｄ情況要留意住ｄ單張幾放出黎，一發現就要拎定比老闆之餘，
仲要留起ｄ以防冇咁快補充到，當然後期到女王或者分行秘書入黎時我會將呢ｄ經驗話比佢地聽，
等邊個一有發現立即通知埋其他秘書拎定。
今日接近六點諗住做埋少少野準備收工，跟住見分行秘書返黎埋時細細聲靜雞雞比ｄ野我，
原來ｄ新野已經放左出黎，於是立即放低晒手上做緊ｏ既野去入貨，
行到半路已經見女王靜雞雞咁拎住一疊野返黎，當我地係做緊同樣ｏ既野，
跟住到我拎埋，幾乎都冇乜剩，我地三個咪話覺得我地好似去偷野咁，
因為唔想比人見到我地收埋定，因放工關係，暫時將ｄ『贓物』收埋ｏ係家姐老闆房先，
跟住我地放工時邊行邊講，我覺得我地三個係公司人所共知的『美女秘書偷竊集團』，
（『美女』係我自己加上去ｏ既∼哈哈∼），一向臭命遠播，
不過我地收起ｄ野都係為左可以應付老闆需要嗟，但我又幾鍾意呢個『朵』媧，
反正我地都比人覺得係衰人黎啦，一於以後用呢個朵黎ｏ係公司行走江湖啦∼嘻嘻∼
| 
