琴日兩個老闆正式出發去杜拜，不過家姐老闆去機場check 完 in 臨上機都有打比我，
同我傾左陣偈同埋講返少少公事，跟住呢幾日就清靜喇，
年中都係呢係可以抖下ｏ既日子，所以人都的確懶散左，最主要都係做下scanning。

琴晚放工陪女王出去深水埗買mon，因為佢屋企部Mon 已經報銷左，
而我真係好耐好耐冇出過去喇，最終女王買左部２２吋的闊mon，應該都有排用喇，
其實女王都一直想買遊戲機，我同分行秘書就一直做魔鬼引誘佢買，
本來佢想買wii，不過我地一輪研究雖然will ｏ既game 得意又有持喇手掣，
不過，我自己覺得ｐｓ３　ｏ既高清遊戲真係超級正，唯一可惜係現階段只有買正版，
若果唔係真係忍唔住買，唔知女王又忍到幾耐呢？？嘻！！

聽晚約左幾個秘書加埋走左ｏ既豹紋同事飯局，依家我負責攪諗住去間日式西餐廳，
之前十次有八次飯局就要就隻豹紋同事去食中餐，
有次我緊持唔食中餐同出旺角攪到幾乎同佢反枱，今日打左比佢話聽晚去邊，
暫時佢好似冇反對，睇下聽日又會唔會接到佢電話又reject，若果係我肯定又企硬鬧鬼佢，
一於睇下聽日點先∼∼

聽日家姐老闆同心急老闆會跟公司去杜拜旅行，
先前因為分行女經理身體問題唔可以去，覺到同佢房ｏ既家姐老闆煩左好幾日，
依家終於係前細佬老闆個RM同事飛過曼谷陪家姐老闆順道玩埋，
咁都好，始終有個人陪老闆唔駛佢咁心煩，不過，今朝家姐老闆又話比個大仔激，
今次係因為怕個教單簧管老師而逃學，攪到家姐老闆鬼咁心煩話去玩都唔安落，
不過話時話我都覺得依家時下年青人真係太多太多問題，
有時諗係咪真係佢地ｏ係太幸福ｏ既環境長大，自細要乜有乜，
完全受唔到氣又唔識面對問題，呢ｄ都係一個半個係咁，好多青少年都係咁，
有時都唔敢想像個社會將會ｏ係呢幫未來主人翁手上會變成點？
家姐老闆猛話唔知係咪上天想佢唔好去想佢留低，反而我同佢講上天係想比個機會佢離開下放開下，
因為我個人覺得要更正或改變一個少年人ｏ既諗法唔係一朝一夕，
單單係擔心同責備只係令雙方磨擦更深，『放開下啦，比自己徹底咁抖返幾日啦∼』
始終係我比老闆ｏ既提議，我覺得就算唔去旅行留ｏ係度問題未必解決到，
希望老闆出去玩時可以真係比自己ｏ既思想抖返下啦。

諗返舊年老闆臨去旅行前忙得要命，因為佢地做左好多野要我幫手跟進，
但今年兩個老闆到依家似乎都生意淡泊咁，家姐老闆約親ｄ人都唔得閒比人放飛機，
而心急老闆放完產假後似乎都要未完全投入晒工作度仲要辛苦湊女，
不過佢地出外散下心都好ｏ既，玩返返黎再捱過囉∼∼

今日聽到個消息，好似先前話我地蝦佢ｏ既攪事妏秘書好似會唔做，
若果係咁就真係好喇，雖然我地都唔理佢，不過依家坐正我後面都有ｄ篤眼篤鼻，
如果係真，真係要燒爆丈喇，可能又比怪獸比我講中，
話得罪親我又剋我憎果ｄ人都冇乜好下場（會離開公司），唔通今次又比佢估中？？

呢排唔知係咪天氣問題，還是早幾日太曳晚晚成十二點先訓而訓唔夠，
琴日真係超級攰，再可以加埋唔夠訓虛火上升，又牙肉腫，前晚就真係爆發時間，
所以好唔舒服，食又冇啖好食，頭又有ｄ痛加眼訓，真係攞命，
琴晚食完飯冇耐都爬上床訓，今日先稍為精神返ｄｄ，同埋牙肉消左少少腫，
好唔容易咁捱到放工，唔理三七二十一，呢兩日幾大都要好好咁訓返飽∼∼