今日先真係星期四，好彩依然唔太忙，今日都仲有少少時間清理下ｄ垃圾，
唔知點解今個星期一返工家姐老闆就靜晒，反而上星期我放假時鬼咁多野做，
攪到麻煩到女王唔好意思，不過咁，呢個星期比我靜下適應返都好ｏ既。
男老闆依然少出現，今日家姐老闆約左男老闆老婆食飯，之後帶佢上黎公司行下，
順便介紹下老闆娘我識，男老闆今日都係比左幾個quotation 我出就冇喇，
暫時男老闆同走左ｏ既心急老闆最大ｏ既唔同，就係客人ｏ既數目，
因為心急老闆做左十幾年，ｄ客好多，變左要follow O既野都多，
日日幫佢開信箱，尤其月尾時ｄ文件真係好多，但係男老闆年頭先入職，
仲係非常新，人客唔多，呢幾日開佢信箱都係『吉』ｏ既，同心急老闆大大不同，
但我都覺得暫時少ｄ野做好，等我有時間慢慢適應同佢夾。
唔知係咪好多人跟公司出左trip，公司靜左好多，
ｄ老闆又唔多野做，所以都有ｄ冇心機做野。自從舊年我ｏ係淘寶網買左平靚水鞋，
ｄ同事都好想買，只係女王同分行秘書鞋碼比較細，好難買到ｏ岩ｏ既呎碼，
呢排開始多雨，大家又想買水鞋，早幾日分行秘書的起心肝上淘寶睇鞋，
睇中幾對膠鞋，都可以落雨著，只係十九蚊，於是買左幾對試下，
今日幾對鞋送到公司，見到都真係唔錯，大家又拎黎睇下試下，
攪到挑起大家條癮想去淘寶，臨放工襯老闆走晒幾個一齊上網睇下，
越睇越開心，睇黎又有幾個無知少女中淘寶毒喇，哈哈∼∼ | 
