<<今日去書城買的新書>>

＊　＊　＊　＊　＊

琴朝去完飲茶，唔想今朝又去飲得咁密，於是去附近茶餐食早餐，
因為呢間餐廳早餐係至朝早十一點半，所以剛十一點半前去到食呢個早餐可以當埋午餐。

食完之後返屋企抖下，因為之前發現附近街市，好想啦怪獸先生過去八下順便買埋餸，
不過怪獸又要去華強北拎野去整，所以先各自自由活動，約黃昏先join 埋一齊。
今日心血來潮想去下中心書城，以前剛開幕時去過一次，不過以前住的地方去購書中心仲方便，
所以之後都冇去過，不過依家搬左黎呢度，坐地鐵唔駛轉車，總站去總站，
所以又想過去行下，諗住之後可以再ｏ係地鐵站join 怪獸先生，於是想做就去做，
去左中心書城一趟。

我依家由『福田口岸』站坐到去『少年宮』唔駛轉車，幾個站就到喇，
今日因為係假期都好多人，所以比較嘈，若平日放假去就好好多。

其實今日心水係想睇下有冇ｄ手工藝書或者環保創意手工書，但冇乜ｏ岩心水，
雖然見到有兩便教整kitty o既書好平，只係二十蚊，若買台灣版就貴好多喇，
不過我諗我縫紉手藝唔太好，所以都係冇買到，不過專登去買唔到書好似有少少唔甘心，
結果買左本廢物利用整盆栽ｏ既書，二十蚊找兩毫，所以買左返去，諗住遲下又想綠化下間屋。

五點幾join 埋怪獸先生去行下街市，費事佢咁大鄉里邊度打邊度都唔知，哈哈！
而我份人就幾鍾意又周圍逛下認下路，話唔定又發現好多好野呢∼

聽日又要返工lu，真係唔捨得ｄ假期∼∼

終於星期六喇，早個星期雖然放左一日假，不過ｄ時間都好似過得好慢咁，
琴晚本來想曳曳夜ｄ訓，不過眼皮唔聽話頂唔順，所以變左好乖咁十點幾就訓喇。
今日訓到十一點幾起身然後去飲茶，之後返屋企上陣網四點左右先再出去餸返屋企整，
於是就咁過左個好悠閒ｏ既星期六喇。

家姐老闆今日做手術，唔知佢情況點呢？希望佢一切都順順利利早日康復啦∼∼

今日重陽節又有一日假期，實在太好喇，可以訓返晏ｄ，
因為呢兩日有少少作傷風，可以訓返夠係好重要，結果今日訓到十二點先起身，
跟住又去左飲茶，之後諗住去超市買下野。

因為依家住果度冇乜鋪頭同大型超市，若要去最近果個要行一個站地鐵，
最初唔多識果就坐一個站果去，依家知道方位ｏ係邊，見天氣開始冇咁熱，
所以都寧慢慢行路過去，順便認下路，結果終於比我發現ｏ係超市附近有個街市，
基本ｏ既魚、肉、菜、雜貨等都有，實在太好喇，咁除左有時放假過元朗買野外，
亦都可以去呢邊ｏ既街市買下野，仲有依家同以前住ｏ既地方最大不同處，
係以前住果邊冇乜港人，除左ｏ係購書中心、吉豬島同埋華強北電腦、手電零件區外，
真係好少會遇到港人，但依家住呢區就唔同，好想會遇到過關黎消遣ｏ既港人，
又或者ｏ係呢邊住的港人，而基本上都可以講返晒廣東話，同以前主要要講普通話唔同，
我諗好快ｄ普通話又會退化返喇∼∼呵呵！！

今日其中整左一味『蕃茄蛋牛肉』，以前我一直都唔識煮牛肉，次次都實到咬唔郁，
所以整得唔好食一路都唔敢再整。上星期睇左『穌good』阿穌教煮『涼瓜牛肉』，
先知道要整滑牛一定要加水先會令ｄ牛肉變軟，呢樣野我真係一直都唔知，
唔怪得以前阿媽成日話我唔好好跟佢學煮餸，到自己整時又唔識，
但今日終於整到嫩滑ｏ既牛肉喇，太開心喇，咁以後可以試識多ｄ牛肉菜式喇，哈哈！！！