琴晚成點幾先訓，不過今日都係十點幾起身，去食完早餐後立即返屋企準備攪攪舊豬肉，
因為今晚想試下自己整燒肉，但事前都要粒鐘準備，因為都要醃成幾粒鐘。
之後就上陣網四點諗住出去買野，好在今次附近個街市仔有我想買ｏ既野，
唔駛專登行去遠ｄｏ既街市。

今次用個焗爐用到有ｄ雞手鴨腳，事關除左用微波果part 之外，我多數用燒烤果部份，
用黎焗野就真係冇幾次，所以個火喉唔太識掌握，包鍚紙ｏ既技巧又唔係咁好，
加上ｏ係呢邊比ｏ係香港難買到靚豬肉，所以咁多樣野加埋就做做唔到理想效果，
個皮爆唔得靚，唔知係咪『吉』得佢唔夠多，怪獸先生話個味道還可以，
都唔叫做失敗，都有五十分，不過我都會吸取經驗，下次會再接再厲，
務求整到成功為止。除左燒肉外，我都會試下自己焗叉燒黎玩下，
好等我用多ｄ同用熟ｄ個焗爐，第日就可以整更多野食喇∼∼

一個星期又過去，呢個星期又開始返最初三個女boss 組合，
雖然心急老闆未正式入返公司，不過佢已經準備出左好幾套建議書，認真利害，
我諗到佢正式可以開工時一定博晒命，到時都會較忙返ｄ喇。
而家姐老闆仲係在休息狀態中，所以暫時都冇咩特別野做。

不過年尾要送比客ｏ既禮品就ｏ係今個星期陸續送黎喇，
即係話我地最忙ｏ既季節又即將開始喇，一開始忙可能就忙到過左聖誕。

琴日因為怪獸先生要OT，所以唔駛急住坐車，所以去左上海街逛逛，
近年慢慢上blog多左睇人整餸，都慢慢開始整下野食，不過我呢ｄ老餅都係比較鍾意做中餐多ｄ，
之前上網成日見到人地話自製燒肉好正，又唔太難整，見得幾吸引，
加上屋企都有個可以烤焗ｏ既微波爐，咪諗又試下玩下，
不過都要買少少工具，就係一支支鐵釘用黎插豬皮ｏ既插，
blog 友教落用黎插完ｄ豬皮焗出黎先爆得靚，我見佢地都係去上海街賣廚具的地方買，
於是襯唔趕返屋企去八下，果然比我揾到，好開心，
另外又見到另一blog 友介紹用黎自製蒸腸粉ｏ既盆，於是又買埋，仲買埋腸粉布添，
我咁鍾意食腸粉，一於試自己自製『布拉腸粉』，即使我三分鐘熱度，
個盆都可以有另外用途用黎裝野，唔駛浪費，買左兩件玩具真係開心，
今日訓醒去完飲茶後去埋街市行下，買定豬肉聽日用黎整燒肉，
不過我就唔係太識分ｄ豬肉邊部份打邊部份，希望今次買ｏ既唔會錯啦。
一於聽日試玩，希望會成功啦∼∼∼

今朝返工o係巴士上撞同我住一河之隔的同事，返到公司我專登望下心急老闆間房，
睇下佢搬左野返黎未，果然已經搬左，不過知佢唔想咁揚，幾乎係要行埋去先見到ｄ野。

家姐老闆話左今日唔返，不過都有電話到，我同佢講心急老闆搬左野返黎，
佢話心急老闆正式開工前先搬返黎等我幫手執野都好，不過我就問由幾時開始，
家姐老闆話心急老闆今日開始ｏ係我老闆架喇，不過佢上星期同煩煩老闆傾完唔記得覆返我，
因為佢一日未覆實我，今朝都唔敢行去揾心急老闆住，當確實左之後我都過去同心急老闆請下安先。

唔見心急老闆幾個月，好明顯地發左少少福，佢話ｏ係之前公司唔駛朝朝九點返工，
同埋早個月因為公司問題生意淡泊左，多左返屋企食飯，唔知係咪咁所以肥左，
佢話返黎要積極減下肥，唔係ｄ衫唔ｏ岩著。而心急老闆走左之後我一路keep 住佢個名牌，
終於又可以重新安ｏ係佢個門度喇。以前心急老闆間房真係多野到飛起，
因為佢走而迫住執晒，而家再返黎相對就非常少野喇，先前好似迫住大家一次過大掃除咁，
雖然心急老闆依家仲未正式入返職，但佢已經有ｄ單已經準備想簽，而且今日都幫佢出左幾份建議書，
果然一如以往佢戰鬥格作風，唔怪得年年咁好數兼係人挖角對象，好似家姐老闆同我講，
『你跟左佢咁多年，就知佢把口成日話唔追數，最終咁又係追到』，不過若唔係咁，佢地又點養得起我媧？

今日開始又再打回原形，變返我入職時一樣服待三個女人，雖然當中曾經有細佬老闆加入同退出，
又有男老闆的加入同退出，但到依家為止難得係仍然保持返最初陣形，睇黎大家都係有ｄ緣份。

至於之前男老闆，因為暫時都未決定去留，又冇理由要佢白比人工我，
所以傾完後應該佢暫又再由女王幫手，我同男老闆都比較緣薄，但女王就唔同喇，
不但止有緣，仲好旺男老闆添，女王幫手時不知幾忙幾好數，我一接左手就影都冇埋，
所以都忍唔住要同女王講：『係你ｏ既始終係你ｏ既∼∼』嘻嘻！！^x^