星期六本來係訓教的好日子，不過琴日就一早起身，
因為約左女王同埋行秘書一齊去整頭髮，因為好快到聖誕同埋過年，
好多人都諗住整個靚髮過節，為免人多要等好耐，所以我地都諗住一早去，
唔想浪費時間等，所以約左佢地九點鐘ｏ係元朗等。

上次我去果間覺得整負離子都ｏｋ，有個同事仔都去過，仲話果度電髮幾靚，
所以諗住拉埋女王佢地去，上次佢地去電髮都成半年前喇，至於秘行秘書，
我同女王都半迫半tum仲加埋威嚇先拉到佢去，都唔明佢後生世女思想咁古舊，
稍微變下都唔敢，上次都係半『夾』佢去，今次都一樣，去到又係話要剪兩吋，
佢無論相隔幾耐去剪髮都係話剪兩吋，真係激死人，不過今次都進步左喇，
上次電大圈，今次肯電中圈喇，而且出黎效果真係唔錯，成個人都新潮左，
比上次效果好，若果唔係我諗佢以後都唔肯再去。

今次比預期用ｏ既時間少左，只係十二點幾三個人都攪掂晒，而我今次係染髮加剪，
比上次又剪短左，好似越剪越短添，不過講真短髮ｏ岩我，因為我實在太懶喇，
唔理佢好唔好睇，至緊要方便易打理，長髮都叫做留過，即使第日再留返長髮都唔會太長喇。

整完頭髮分行秘書因為約左人走先，而我就同女王周圍行下，因為女王未到過元朗，
反正去到都要去行下啦，我帶女王去買又平又好食ｏ既糯米磁、食下碗仔翅、
跟住等埋怪獸先生放工過黎一齊嘆茶後，再帶佢去買元朗出名ｏ既『老婆餅』，
同埋澳門名手信即燒『牛肉乾』，之後大家就各自歸家喇。

今日朝早起身睇完『千秋王子』先去食野，跟住去左行街買野，都有少少收穫，
夜晚又好似涼返少少，聽朝唔知凍唔凍呢？？

十二月喇終於~~時間過得好快呀~~

踏入十二月真係忙左，因為老闆們都會追數，加上又要幫佢地寄聖誕咭添，
又係個句，最怕就係攤開晒野時佢地不斷揾我做乜做物，又時真係幾閔，
因為點都要望住日子黎完成工作呢。仲有煩煩老闆個囡囡ｏ係澳洲放暑假返黎，
身為阿媽唔想個囡ｏ係屋企無所事事，揾佢返黎幫手scan野本來係好事，
佢scan野真係好快，因為全部就咁放ｏ係部影印機度『發發聲』就攪掂，
但我都抽唔到時間黎執佢scan 完ｏ既野，若教佢分晒類先scan，咪又係要用時間黎教，
所以都係算把啦。可惜煩煩老闆份人計教，佢叫阿女返黎係幫手做佢ｏ既野，
若果係阿女係幫我做野，我就大把野揾佢幫手，只少ｄ聖誕咭可以揾佢幫手做，
果ｄ係手扳眼見功夫，唔係教都得丫嘛∼

上星期前細佬老闆個RM同事揾我，叫我幫手打比以前果個成日叫我阿媽個囡囡返黎幫手，
因為聽講呢排遇著金融海嘯，本來揾到間公司又話要減薪，所以佢都冇入到去，依家冇野做，
前細佬老闆同佢阿媽都好熟，諗住揾佢返黎幫手做下ｄ scanning 同埋打電話咁，
點知隻囡依家好似冇乜信心，話覺得好似次次返黎都係揾呢度做避難所咁，
咁我又覺得都冇乜所謂啦，做住先之嘛，好過日日坐ｏ係屋企冇野做，出街都要駛錢架，
不過暫時未知佢諗成點，星期一先叫RM同事再揾佢，不過若佢真係返黎又諗起要過ｄ湊囡日子，
雖然依家佢都大個女左，比以前成熟，但點都係比較嬌嗲，都唔明點解成日要人做埋ｄ阿媽角式，
人家明明『思想』好細個之嘛．．．．．

上星期有兩晚可能訓得唔夠，星期五覺得喉嚨有ｄ痛，睇黎真係一唔夠訓就好易打敗仗，
本來琴日約女王一齊去整頭髮，不過天氣凍凍大家都係對住張床耐ｄ好ｄ，所以改下個星期先去，
而我呢兩日訓返多ｄ，再少少藥感覺好似好ｄ，至少冇惡化，係耐唔中有ｄ咳啦，
所以好明顯係話ｄ病菌一定係等你抵抗力弱時乘虛而入，所以呢ｄ天氣真係要休息夠先好呀∼∼

又一個星期喇，聽日踏入今年最後ｏ既一個月，日子過得真係快。

早幾日涼左ｄ，但好彩天氣好好，琴日係今年入秋以黎第一次打邊爐，
本來諗住兩個人食，點知大學朋友仔突然過左黎，好在我地一向份量都預多ｄ，
結果四個人食都食唔晒。

今朝起身睇完重播ｏ既『交響情人夢』先去食野，
之後過華強北幫同事換返條褲仲另外還多兩條，跟住睇下有冇ｏ岩心水ｏ既boot，
咁ｏ岩ｏ係一間睇到對今年興ｏ既『蘇蘇』boot，於是問下咩價錢，
冇諗過答案係『一百』蚊，我覺得個款都ｏｋ，而且個size 可能ｏ岩我，
於是試下著，果然真係ｏ岩，老闆話係斷碼所以特價，我睇過都新淨ｏｋ，
而且一佰蚊都好抵，即使計番港幣都係百鬆ｄ，就算淨係興今個冬季都叫抵，
所以決定買左佢，其實今年都心思思想買返對呢種款，估唔到咁ｏ岩撞到又平又ｏ岩心水ｏ既，
真係太開心喇，又有新鞋著喇∼嘻嘻！！