剛放完一日假，其實holiday mood 未完，因為返兩日放假，下星期又放一日。

家姐老闆今日本來話唔返，因為佢要去睇醫生，最近佢發現頸生左舊野，
上星期去睇完醫生，醫生轉介佢要去抽組織驗下，晏晝佢check 完打比我，
抽左組織去驗，暫時未知結果，不過點都係要做手術，問題只係結果需緊急做定係可以邂ｄ，
但以我家姐老闆咁心急ｏ既性格，一定要做ｏ既野佢寧願第一時間做左去，
唔想成日心掛掛，加上十一月佢要陪細仔去覆診，佢更加心急想快ｄ攪掂。
問過醫生應該最快下星期先有得做，休息可能要兩個星期左右，
所以今年睇怕都冇可能追到數架喇，但呢ｄ都係身外物，希望一切係好ｏ既結果。

晏晝個個要開會，先有機會上網玩下，ｏ係facebook 仲add 埋走左ｏ既心急老闆添。
佢唔係咁好彩，剛過左去最近有事ｏ既保險公司，ｄ人對間公司失左信心，
即使幾勤力幾叻都好，我諗短時間對業務都好大影響，所以我地好多人都好想佢返黎，
其實佢都係考慮中，唔知會唔會仲有機會同佢再續賓主關係？佢對我黎講係一個好老闆，
希望有咁ｏ既一日啦。
 

幾乎兩個月冇打日記，本來去完北京返黎打左篇北京遊感想，
可惜打晒成篇日記之後襟錯掣，攪到成篇日記冇左，最終攪懶打日記幾乎兩個月，
今日踏入十月份，所以要的起心肝趕走懶筋點都打返幾粒字先得∼∼

呢兩個月都算變化幾大，搬完屋兩個月一切都叫做適應落黎，
而工作上呢排都算得閒，因為新老闆去向暫時都仲係一個謎，
話說新老闆接左佢手後比較靜，唔係太多單入，其實佢地呢行頭兩年係要捱下，
可能新老闆以前份工職位高收入高，突然收入減少變得開支大，
所以有諗可能轉行，但又唔想真正離開呢度，所以呢個月會暫時去新公司試下，
呢度就似停薪留職咁。因為去向未明，所以佢暫時都仲夾份請我，
但因佢唔ｏ係公司，所以我都會幫下細佬老闆手，真係山水有相逢，
met 極都met 唔甩佢添，好彩以前冇得罪佢，哈哈．．．．
當然我都明白佢地其實都對我唔錯，不過上個星期聽家姐老闆同細佬老闆口氣，
男老闆可能都會返黎做，因為份新工經常要出trip飛來飛去，
唔係太ｏ岩佢呢種已經有家室ｏ既廿四孛老豆，但點都好，
一切都唔到我控制，隨緣囉，煮到埋黎先算喇。

呢排比女王同分行秘書引左成日去facebook 玩，今日去書城買左本勾公仔書，
睇黎日後可能又好忙喇∼∼

今日終於係出發去北京的日子喇，琴日慶幸過左個唔太忙碌的工作天，
雖然都係多得煩煩老闆，唔到最後一秒都唔比工作我，所以都攪到遲晒走，
但好在本身我都要等埋細佬放工過黎比埋ｄ野我，細佬都confirm 買左機票星期六會去北京，
不過佢ｄ時間仲緊過我，雖然話原訂係下午一、兩點到北京，但飛機ｏ既野好難講，
真係隨時怕佢delay，若果當晚趕唔切入場，山水水遠飛過去真係幾浪費，
雖然ｄ飛我會拎埋過去，萬一佢趕唔切我都會去睇，不過都希望當日順順利利啦。

琴日聽到一個令大家失望ｏ既消息∼劉翔因傷最終退出左比實，令到十幾億ｏ既人失望，
好多人都係為左睇劉翔，而我本來聽晚都有機會一睹佢ｏ既風采，
但好多野往往人算不如天算，但換過黎講，受左傷夾硬跑亦冇意思，
不但唔會拎到好成績，仲可能令傷患加重，雖然大家都萬般失望，
但亦然希望劉翔傷患早日康復，聽晚失落左劉翔，會寄望睇男子２００米，
牙買加選手會否再破紀錄。

一陣我會返紅磡坐『京九』線到北京，三點十六分開車，預計聽日接近四點到北京，
聽日行程會幾趕，到步後要立即飛奔去酒店放低野然後再飛去奔『鳥巢』睇賽事，
希望唔會遲大到啦∼∼ ^^"

希望今次北京奧運之旅可以玩得開心，我會盡力影ｄ靚相返黎比大家分享架喇∼

好喇，要下星期一返黎先見咯∼ 拜拜∼(^O^)/