以往臨近暑假工作一般較少，因為ｄ老闆們有兒有女ｏ既都會放假陪下仔女，
不過今年就有唔同，因為轉左老闆，做ｏ既野都有ｄ唔同，
男老闆雖然暫時唔太多保險上ｏ既野做，不過另外自設公司上ｏ既野就幾困身，
呢個月頭幾乎隔日就要寄五十封信，本來都唔係難做，但要花時準備收信人資料，
又要手寫信封同埋續封信打名，其實都花唔少時間，最慘係呢幾日家姐老闆有野做，
每都都有重覆再重覆ｏ既建議書要準備，改價錢、改年紀、改吸煙狀況，
ｄ保單內容不斷咁改，改完又改，真係幾影響心情。

上星期同走左ｏ既心急老闆傾左幾句電話，佢第一句就話好掛住我，
我都好掛住佢，尤其呢排，因為以前幫佢手ｄ野冇咁煩瑣，
佢話依家好似冇左對手咁媧，因為佢依家請ｏ既秘書幾個人一齊請，
唔好意思用咁多，所以好多野都要自己做返，咁都明白佢苦況ｏ既，
所以都幾懷念以前ｏ既日子，可能咁ｏ岩呢排較忙啦。

今日先清上星期五ｏ既野，但當中又要幫男老闆另外公司ｏ既野，
都幾dup 時間，到四點幾好不容易清左上星期家姐老闆比我ｏ既野，
不過臨放工又黎一堆，真係好似沒完沒了，唔得！佢一定要出去簽晒ｄ單返黎，
唔係對唔住我喇∼∼最慘聽日又係寄五十封信ｏ既日子，
而有個稿件今日先send 去比人印，聽日中午先有得拎，睇黎晏晝又趕到褲甩，
真係唔明點解ｄ時間下下都預到咁遲，而且咁樣我真係冇空閒時間跟進其他野，
唉∼想快ｄ捱完今個月呀∼∼　 >.<

今日係七月一日，今年又過左半年喇，時間真係過好快咁，
又進入下半年喇。

今日有一日假期，天氣非常之好，天清氣朗，陽光普照，同琴日朝早簡直天淵之別，
話說琴朝返坐車途中，睇住ｄ雨區ｏ係香港東邊飄過黎，ｄ雨落得非常之勁，
琴朝返工時見天色好似幾明朗所以冇著定水鞋，但好彩都著定膠鞋以防落雨。
落車時ｄ雨細返少少，唔駛咁狠狽，不過見九龍公園ｄ樓梯都已經變左瀑布喇。

其實今日返工幫家姐老闆同RM同事拎對水鞋返黎，雖然RM同事話唔想煩我，
等佢過黎我果邊拎，不過對鞋到左佢地又點會唔心急丫？加上最近咁多雨落，
好彩今日有個私人速遞幫我手拎返去。結果如我所諗，RM同事返到公司同我講，
佢同家姐老闆都好掛住我．．．．幫佢訂對水鞋，我話佢聽我已經拎左返黎喇，
佢兩個立即開心到飛起，都話架啦，若唔幫佢地拎返黎，咪又係比左無形壓力比我？

我拎兩對水鞋去家姐老闆房比佢地睇時吩咐佢地要低調，因為之後有人見到實又想買，
我好坦白同家姐老闆講我唔想再接order，因為太困身喇，幫人訂事少，
過程中要問來問去太麻煩喇，同佢地熟就冇所謂啦。
家姐老闆都明白，不過就急不及待拎對鞋黎著，我都明返工時落大雨大家ｄ鞋都濕晒，
而且佢地似乎好開心好滿意，家姐老闆中午要出街，仲立即著新水鞋添，
然後又出黎比我睇，呢個時侯立即有同事讚老闆對鞋靚，
老闆都好醒目話叫我比條link 佢自己睇自己訂啦，之後冇耐佢就出街喇。

老闆出左門口冇耐我行開左miss 左家姐老闆電話，以為佢有公司揾我，
原來佢話一出門口坐電梯撞到同事，又比人讚佢對鞋靚，問ｏ係邊度買，
佢唯有又叫我sent link 比人，好彩事先同佢講定唧，sent link 比人我唔介意，
若幫人再訂就唔好攪我喇。

另外分行秘書幫女王、男老闆老婆訂ｏ既水鞋都到左，我地又一齊呢入房又睇又試，
連男老闆老婆對水鞋都到左，要做ｏ既野終於完成，實在太好喇，
後尾家姐老闆又打比我，佢又叫我Sent 條Link 比佢個客媧，因為人家又係咪讚佢對鞋靚，
本來佢話晏ｄ會返但後尾唔返，因為都成五點幾，我仲同佢講可惜，
因為分行秘書訂ｏ既水鞋到左，諗住比佢講下，冇諗到家姐老闆話想返黎，不過又趕唔切，
於是我同佢講男老闆老婆同埋分行女經理果對未拎，等佢返黎睇下先。
真係估唔到家姐老闆好似中毒仲深過我，實在好攪笑，睇黎我地真係可以做『超級魔鬼』，
連老闆都引誘埋陪我地一齊癲埋一份，真係笑死！！

琴日臨放工好鬼忙，聽家姐老闆話今日唔返黎，
本來滿心歡喜今日有得抖下，點知事與願違，先係家姐老闆結果都返過黎一陣，
本來都問題不大Ｏ既，做到咁上下RM 同事過黎話揾我幫手，
而最唔鍾意聽到『趕』呢個字，其實真係幾反感，因為對我黎講，
一個『趕』字唔知係趕到咩程度，我係比較鍾意人地話比我聽ｄ野係要幾時完成，
咁我會就住時間去做，我總唔可能立即將手頭上做緊ｏ既野放低晒，
因為我手頭做緊ｏ既野一樣係趕。所以我都係話比RM同事聽我要做埋手上ｏ既野先。
原來佢係想我幫手貼label，男老闆同前細佬老闆間公司印ｏ既事因為整錯名，
要用label 遮左佢，呢份野佢地係想中午十二點先要，
不過ｏ係我幫手前RM同事都攪掂左，佢地話先貼八十本，
雖然呢樣野都係要快手做，但都唔係十萬火急立即要，所以第日都係要同RM同事傾傾，
希望佢大概可以話到想我做ｏ既工作幾時完成仲得我就時間仲好。

原本以為攪掂左呢單野，男老闆同RM同事一齊去上堂可以有返ｄ清靜，
咁晏晝清完手頭上ｏ既工作就準備下個月寄信ｏ既野，於是食完飯先去Bank，
將ｄ Branch fund 支票drop box，因為銀行就係對面馬路，
應該大約十分鐘應該返到公司，於是專登唔帶電話，點知之後返公司一睇，
三個miss call 加兩個message，全部係家姐老闆，家姐老份人好心急又要穩陣，
要揾你時必打爆電話兼留message，務求一定要揾到你為止，忙果陣都真係唔想聽電話，
所以有時行開行埋都唔想拎電話，唔想比追魂去奪命，今日返到公司覆完電話比老闆，
本來要幫佢check 一份野，點知跟住RM同事打黎，話要我去地鐵站拎野比佢代男老闆揾客收保費，
於是一返公司又要出去，最攞命係佢去完揾客後，我一陣又要再去地鐵站拎返再返公司，
真係聽到都想死，兩次咁來來回回都要花差不多成粒鐘。不過RM同事就仲慘過我，
原本佢同男老闆加前細佬老闆去金鐘上堂，點知要代男老闆先過黎尖沙咀接過我ｄ野，
然後去藍田揾客收票，之後又返黎尖沙咀比票我，再返去金鐘同佢地上堂，
最慘係佢遊地鐵河之後，都係趕唔切截數前交張票比我，而佢問我地ｄ老闆係咪唔駛再過金鐘上堂，
但ｄ老闆叫佢繼續過去，佢真係足足ｏ係地鐵遊走左成個晏晝，真係好陰公，
若果比著係我，我肯定皮質淳偏高都似，咁RM同事份人做野雖然係好心急，
不過脾氣應該比我好，我驚我真係發脾氣都似。而我都係因為走來走去，
都唔可以定定地做下野，到臨放工前都唔理咁多喇，有ｄ野都唔做住，
點都要先完成RM同事比我做第一批信ｏ既名單，因為唔知下星期一咩環境，
我怕又係咁忙做唔到時，星期三唔知點寄出第一批信，我唔想又比人催，
我怕催兩催又發脾四，依家唯有寄望星期一有ｄ時間打埋第二批ｏ既名單啦。

好在又到星期五，咩都唔理喇，放左假先算喇∼∼