又黎寫週記喇，今日發現今個月原來都冇幾日打日記，
真係超級懶，不過都同天氣同埋精神狀態有關，剛過完大暑果然真係超級熱，
今日出一陣街去完街市返屋企，自己都聞到自己好臭，
遲ｄ去北京仲熱都唔知點算∼∼ ^^|||
剛過ｏ既一星期都算清靜，上個星期男老闆去左泰國旅行，佢ｏ既野就暫時停一停，
男老闆返黎後又到家姐老闆去左北海道旅行，所以都有幾日清靜，
不過下星期又開始幫男老闆寄一堆信，唉，真係沒完沒了。
琴晚同幾個秘書放工後出去飯局，雖然只係幾個月攪一次聚會，
但我覺得好似做苦差，本來係開開心心同幾個秘書一齊聚下都埋食餐生日飯，
不過每次都要就住走左ｏ既豹紋同事就覺得不快，
自從有次我幾乎興到想反枱後，我都避左比機會佢去reject我地諗ｏ既地方，
我費事自己忍唔住扯火。今個月豹紋同事有份生日，佢居然自己打電話黎問係咪有飯局，
ｄ人真咁『老馮』，覺得人地實要請佢食飯，可能諗住以往請左人地今次唔好蝕底啦。
今次飯局舊分行秘書好好，都專登打黎問我有冇心水地方，因為有時都係我諗地方ｏ既，
呢次我話未諗到，咁佢都提議左去食韓燒，其實大家一向都冇乜所謂，一直都係得一個人麻煩，
不過到琴日舊分行秘書打比我，話依家喉嚨唔舒服唔想再食咁熱氣想改地方，
大家都覺得冇所謂，因為佢係有原因，本來諗住轉返去上次旺角ｏ既一間日式餐廳，
但都已經full 晒，餐廳職員提議不如去北京道新開的一間，我地幾個當然冇所謂，
不過一諗豹紋同事話黎尖沙咀話好遠攪到我幾乎同佢反枱，所以我都話不如去返旺角，
咁我立即上網揾到間旺角上樓cafe，雖然未去過，但見食評唔錯，所以一齊去試下。
放工上到去間cafe大家感覺都唔錯，其中同事仔因為要拎部電話去整所以晏少少上黎，
於是大家先叫ｄ小食先，ｄ小食唔錯真係幾好味。本來大家有諗過再叫個小食拼盤，
不過同事上到黎，咁我提議不如每人叫個主食然後加錢叫多杯野飲，
但我叫完之後豹紋同事仲係想食個拼盤，但我覺得可能會太多，不過佢似乎仲係想叫，
話好肚飯媧，舊分行秘書好好人，都諗住就下佢叫埋，咁我都冇所謂，不過已經同豹紋同事講，
若果食唔晒佢要包底，結果我地orde 左個最大ｏ拼盤，點知黎之後都發現我地真係估計錯誤，
原來份量都幾大，結果ｄ野黎齊之後，大家真係食唔晒。
其實我都失察左每人一個主食份量可能太多，但因為未黎過呢度唔知ｄ野ｏ既份量，
不過有ｄ都好冇乜食過唔要好似好浪費，但要大家拎走大家又怕路遠同拎返屋企冇人食，
咁呢個時侯我梗係同豹紋同事講，叫佢包底拎返屋企食，佢又話屋企冇人食，
我係唔係好順氣佢好不負責任，咁我覺得我都預計錯誤，就算山長水遠都拎走ｄ，
而舊分行秘書又係好好咁都幫手拎走ｄ，雖然女王同同事仔冇拎，但我唔覺得有問題，
其實都唔關佢地事ｏ既，但我真係好唔鍾意豹紋同事果種不負責任冇義氣ｏ能度，
再者佢依家出黎，若果地方或食ｏ既野唔太ｏ岩佢口味，佢都會冇乜野講兼口黑面黑，
琴晚因為舊分行秘書唔舒服，所以早走ｄ去睇醫生，我地剛食到好飽諗住坐多陣，
但豹紋同事顯然已經好不耐煩提議埋單走人，我就更加覺得佢個人好唔掂，
佢咁ｏ既性格真係無藥可救。雖然以前都會覺得佢細個屋企背景問題，
要好細個出黎捱世界，所以形成ｄ奇怪ｏ既性格，而且冇乜朋友，年紀一把又未結婚，
得返自己一個人住，都覺得佢好慘，雖然有時對住佢真係激鬼死，不過都算啦，
依家都係耐唔耐見一次嗟，算啦。
不過經過埋今次，我都係決定唔再出去同佢食飯喇，因為我覺得大家聚舊都係想開開心心，
冇理由次次要就住佢，唔通冇左佢我地會唔開心咩？我諗應該剛剛相反囉，
佢冇朋友都係佢自己造成，唔係我地ｏ既錯，冇理由因為佢係孤獨精我地就要就佢，
其實所有野係因為都係佢自己做成，朋友同埋鍾意佢ｏ既人都比佢ｏ既性格趕走晒，
甚至連打工都比人炒，都又係因為佢ｏ既性格，佢一日唔覺得自己有問題，
一日唔改佢ｏ既性格，佢以後都會係咁，可惜ｏ既係，睇黎佢係唔會改變，
雖然佢自己聲稱已經好左好多，而我自問都再做唔到佢朋友喇，因為對住佢只係唔開心，
咁何必再要對住呢？我又唔可以改變到佢，咁我唯有選擇唔好對住佢囉∼∼
當然，我唔會要求其他同事同我一樣對佢，不過再有飯有佢我唔會去架喇，
其實其他幾個秘書都仲係公司做，至多都係樓上樓下，要約都唔係好難，
到佢地生日時，我寧願自己揾時間請返佢地食飯，我都唔想再參與有豹紋同事ｏ既飯局。
之前好幾次因為豹紋同事都好激氣，不過今次我都冇乜激氣喇，
可能因為已經決定放棄，都再冇咩值得激氣ｏ既地方，今
餐飯唯一係有ｄ唔好意思要幾個同事仔無啦啦洗多左錢請我，
話晒大家都打份工人工又唔係多嘛，但我寄望我地第日ｏ既飯局可以開心ｄ，
鍾意去邊同食乜都得咁就好喇∼∼
| 
