終於可以o係屋企打日記喇，不過暫時都未係用自己部機，
但點都好用住先啦，因為好多野都未有時間做住，因為過出發赴京喇。

呢排ｄ秘書個個都輪住放假，大家一來想清下假同等襯放暑假比較靜ｄ，
分行秘書同埋女王仲有短跑同事都分別同我ｏ既假期搭住放假，
其中廿五、六號女王同我都放緊假，我心血來潮話不如廿六號一齊放假，
因為果日我都返左黎，只係諗住放多日假休息，講到分行秘書心郁郁，
立即打比短跑同事，佢都立即拎假，依家我地分別申請晒放假，
廿六號暫時打算叫佢地過黎深圳食下野，因為之前話左過黎幾次都落大雨，
希望今次順順利利啦。不過ｄ老闆們唔知我地一齊放，怕佢地叫救命，
其實都係一日之嘛，講真我地個個都唔同老闆ｏ既，影響都唔大嗟，
冇埋由ｄ老闆成日有得一齊去玩我地冇架嘛，唔聯誼下增進感情，
咁就唯有選擇不和架喇，叫ｄ老闆諗下邊樣好啦∼∼呵呵∼

星期五細佬放工過左我新居度訓，今次真係超級多謝晒細佬幫我訂晒酒店，
唔駛我地過到去先再揾，真係慳好多時間，只係到步果日時間比較趕，
因為一到京立即要樸去酒店然後再樸去會場，剛到步一切都未能預計，
希望型火車順順利利唔好遲到啦，細佬仲話可能星期五會飛過北京，
若買機票的話，最主要睇下機票價錢，因為佢都想去感受下奧運氣氛，
若佢真係會去北京我會讓左星期六晚場飛比佢，反正我都睇左一場，
呢個百年難得一遇ｏ既盛會，可以大家都分享到就最好。
不過細佬只剩一日假，所以可能要星期五飛去，星期六晚睇比實，
星期日就飛返黎，但依家未決定，我諗要到我去到北京佢先決定到，
好彩依家去到邊都收到電話嗟。

今日專登出左元朗行左陣，為左去旅行買少少野，好彩ｏ既係果邊係夏天，
唔駛拎咁多野，不過因為熱要預定帶幾件衫，依家剛搬完好多野又未執好，
所以都係去買ｄ平平地ｏ既頂住先。今次難得買左兩件好sharp o既Tee，
隻怪獸話入場去威，著得sharp D會開心ｄ媧，於是我買左件螢光橙色，
佢買左件螢光黃，真係sharp 到震，隻怪獸成日話不知幾想著件『哥斯拉戰衣』去添，
我話果邊咁熱，比到佢入場都熱死佢。不過我幻想佢著住件『哥斯拉戰衣』，
係跑道上比工作人員追住黎捉一定好攪笑，我諗實上晒電視全世界都知出晒名喇∼哈哈∼

聽日仲要返埋先放假，今次放假放得最耐，足足一個星期，ｄ老闆又猛叫慘，
希望聽日唔好咁多野做啦。總之一切都準備得七七八八喇，
『We are ready』∼∼∼∼∼

急急忙忙的揾樓、搬屋，總算攪掂左，依家都入左伙叫一星期，
一切都ｏ係適應中，好似返工放工時間同路線等，但我諗應該都好快適應。

雖然屋企寬頻都已經裝好，因為做開ｏ既電腦都未安頓好，
所以一直都仲未正式可以上網打日記，依家ｏ係公司抽少少空出黎打個日記仔報下平安都近況。

奧運終於都開幕喇，依家日日都幾關心國家隊的成績，而我下星期二都出發赴京喇，
暫時都仲未感到太興奮，或者仲未有太多準備啦。

下星期二我會坐火車赴京，星期三下午會到北京，當晚（２０號）我就會睇第一場賽事喇，
如無意外當晚會睇到劉翔演出添，而下星期六（２３號）晚會睇第二場ｏ既田徑賽，
第二日（２４號）朝早我就會坐火車回程，２５號會返到屋企，然後再休息多一日先返工。

今次行程暫無特別安排，好彩多得我細佬幫我揾住宿同介紹行程，仲借埋部相機比我地試機添，
希望可以影多ｄ相返黎回報佢同比大家一齊分享啦。

好期待呢個北京奧運之旅呀∼∼Yeah!!!

今日又要返工喇，但琴晚好快訓得著，因為星期六、日都要奔波揾樓做左好多野，
又冇訓到好晏，同平時放假感覺唔同，所以覺得好似冇放過假咁。

今日有眼訓陪住做野，晏晝前細老闆個大學同居密友黃sir 約左RM同事，
之後順道果黎探我地，幾得真係好耐冇見過佢喇，不過真係發福不少，
怪唔之得前細佬老闆成日用『肥仔』黎提佢，但好慘ｏ既係返黎所有認得佢ｏ既人都話佢肥左，
我都好明白成日聽到比人話肥左ｏ既感受，係勁無奈ｏ既，但可能比人話話下就習慣。

今日放工去同新業主簽約，但當中出現左ｄ小風波，本來約好八點鐘，
後尾地產打黎話業主突然要同老鄉食飯，所以未必黎到，
但我地方面肯定say no啦，後尾地產又話見業主簽地張合同再比我地簽，
咁樣當然唔可能啦，簽約當然要雙方三口六面傾架嘛，我都知內地係咁求其，
但我地就唔妥協一定要見業主，本來話見我地去食店見業主，後尾攪左一輪後業主親自到黎，
事件最終完全解決，簽左合同比左錢收左拎埋鎖匙喇，咁聽日可以搬入去喇。

由四年前開始租朋友屋每個星期上黎渡假開始，之後仲搬埋上黎添，
呢幾年都一直住ｏ係深圳最大電腦零件批發習散地『華強北』，
呢度又係深圳一個重要ｏ既商業圈，不過亦因為咁租金一向比較貴，
隨住人民幣升值，怪獸又回歸香港做野，所以都唔再考慮租呢區，
寧願選擇租金較平同埋過香港方便的關口附近，整整四年ｏ係華強北出沒，
過埋今晚都應該劃上句號，當然將來會唔會再搬過黎會係未知數，
但暫時黎睇都應該未必會，所以今晚都要告別華強北，
聽日開始應該又開始適應一個新的地區。

因為新居未裝寬頻，所以應該暫寺未能上網，等一切安頓好後先再打日記，
到時會放ｄ新居新環境ｏ既相上黎比大家睇下。